Антон Сафронов: «Муус оҥоһуктаах бырайыактары сайыннарыахпыт»
СӨ Инвестиция уонна предпринимательство дьыалатын минииистирэ Антон Сафронов Өймөкөөн Томторугар “Тымныы полюһа — Өймөкөөн” кыһыҥҥы туризм бэстибээлин аһыллыытын сиэригэр-туомугар сырытта.
Елена Потоцкая, «Саха сирэ» хаһыат, edersaas.ru
Ол кэнниттэн “Чысхаан резиденцията” диэн Эбэ Хайатын иһигэр оҥоһуллубут муус оҥоһук штольнятын көрдө. Бу Өймөкөөҥҥө кыһыҥҥы туризм бэстибээлэ ыытыллар буолуоҕуттан ыла, улуус биир бөдөҥ туристскай эбийиэгэ.
«Ил Дархан Егор Борисов бэйэ бородууксуйатын оҥорон таһаарыыга улахан болҕомтотун уурар. Резиденция муус оҥоһуктара — туризм хайысхатыгар бэйэ бородууксуйатын оҥорон таһаарыы чаҕылхай холобура. Туристскай эбийиэк кыһыҥҥы эрэ кэмҥэ буолбакка, сылы эргиччи үлэлиир. Бүгүҥҥү бэстибээлгэ бэрт элбэх омук туристара кэлэ сылдьар кэмнэригэр “Чысхаан резиденциятын” киэн тутта көрдөрдүбүт. Өрөспүүбүлүкэҕэ эрэ буолбакка, Арассыыйаҕа уонна аан дойдуга тиийэ бастыҥнар ахсааннарыгар сылдьар норуот маастара, СӨ култууратын үтүөлээх үлэһитэ Александр Шадрин “Чысхаан резиденцията” муус оҥоһуктара дьону олус сөхтөрдө. Туристар оҥоһуктарга туох технология туттулларын интэриэһиргииллэр. Онон хаартан уонна муустан оҥоһуктар Сахабыт сирин саамай дьиктитэ уонна уратыта буоларын өйдөөн туран, маннык суолталаах бырайыактары сайыннарарга болҕомтобутун хайаан да ууруохпут«, — диэн бэлиэтээтэ миниистир Антон Сафронов.
“Тымныы полюһа” бэстибээл чэрчитинэн миниистир бүгүн Томтор нэһилиэгэр туризм хайысхатын сайыннарар соруктаах предпринимателлэр үлэлиир усулуобуйаларын үөрэтиэҕэ, Өймөкөөҥҥө урбаан салаатын сайыннарыы боппуруостарыгар санааларын истиэҕэ.
Елена Потоцкая, «Саха сирэ» хаһыат, edersaas.ru