Анна Зверева «Айхал эйиэхэ Аар Тайҕа» көбүөрүн Айсен Николаевка анаата

Бөлөххө киир:

Бүгүн, сэтинньи 18 күнүгэр, Дьокуускайга  Емельян Ярославскай аатынан Саха сирин устуоруйатын уонна култууратын мусуойугар «Айхал эйиэхэ Аар Тайҕа» диэн Анна Николаевна Зверева бырайыагын чэрчитинэн «төгүрүк остуол» буолла.

Тэрээһин сүрүн соругунан Сергей Зверев–Кыыл Уола «Айхал эйиэхэ Аар Тайҥа» айымньыта айылҕаҕа ураты сыһыаны кэрэһэлиирин, ону сэргэ бу айымньы ситиминэн тигиллибит, Сахабыт сирин кэрэ айылҕата ойууламмыт көбүөрү мусуой түмэлигэр бэлэх уунааһын буолар. Бэлиэтээн суруйдахха, бу көбүөрү Анна Зверева уонна бүтүн өрөспүүбүлүкэ иистэнньэҥ норуот маастара далбар хотуттара кыттыһан оҥорбуттар.

Анна Николаевна Зверева: «Бу көбүөрбүтүн Сахабыт сирин Ил Дарханыгар Айсен Николаевка аныыбыт. Билигин пандемия буолан наһаа уустук кэм, ол эрээри биһиги Ил Дархаммыт бу кэмҥэ этэҥҥэ үлэлиэҕэ диэн эрэнэбит уонна ситиһиини баҕарабыт. Бу көбүөргэ бүтүн Сахабыт сирин аар айылҕата көстөр», — диэн санаатын үллэһиннэ.

Чахчы, тэрээһин кэмигэр көбүөр тиирэ тардыллан бар дьон хараҕын далыгар этэ. Сахабыт сирин маанылаах айылҕата, очуос таас хайалара, булда-алда, сирин баайа барыта ойууламмыта киһи хараҕар тута быраҕыллар уонна төрөөбүт дойдубут киэҥ нэлэмэн киэлитин көрдөрөр буолан ураты санааны киһиэхэ үөскэтэр оҥоһук буолбут.

Тэрээһин кэмигэр көбүөрү тиксибит иистэнньэҥ, маастар далбар хотуттарга бочуотунай грамоталары, эҕэрдэ суруктары Экология министиэристибэтин уонна Ил Түмэн аатыттан туттартаатылар. Маны сэргэ, мусуой түмэлигэр «Төрөөбүт дойду» диэн Нам улууһун Түбэ нэһилиэгин оҕолорун уруһуйдарын быыстапката турда.

Ульяна ЗАХАРОВА.

+1
0
+1
0
+1
0
+1
0
+1
0
+1
0
+1
0