Ааспыт өрөбүлгэ Чурапчы улууһун Чыаппаратыгар бэлиэ күн буолан ааста. Аҕа дойду улуу сэриититтэн Кыһыл Сулус уордьаннаах эргиллэн кэлбит уоттаах сэрии бэтэрээнэ Семен Николаевич Оконешников-Уордьаннаах Сэмэн кыыһа СӨ гаас салаатын бэтэрээнэ, Алаҕар нэһилиэгин бочуоттаах олохтооҕо Анна Семеновна Оконешникова аҕатын төрөөбүтэ 100 сылыгар, Хоту көһөрүллүү 80 сылыгар анаан нэһилиэк түмэлигэр павильон туттаран бэлэхтээтэ.
Кини бырааттарын, аймахтарын, үтүө дьыалаҕа кыттыһыан баҕалаах нэһилиэк олохтоохторун түмэ тардан тутуу бэрт түргэнник баран, өрөбүл күн онно киирии сиэрин-туомун нэһилиэк баһылыга Ньургун Петрович Попов салайан ыытта. Кини Анна Семеновнаҕа барҕа-баһыыба тылларын этэн туран, Махтал сурук туттарда. Алгысчыт, СӨ үөрэхтээһинин туйгуна Михаил Иванович Оконешников аал уоту аһатан үрдүк айыылартан көрдөһүү сиэрин-туомун толордо. Түмэл салайааччыта Егор Дмитриевич Сорокоумов бу тутуу нэһилиэккэ бастакы улахан бэлэх буоларын бэлиэтээтэ. Маннык бачыым инникитин өйөөччүлэрдээх буоларыгар баҕарда. Дьокуускайга олохсуйбут биир дойдулаахтар “Алаҕар аймах” түмсүүлэриттэн эҕэрдэ тылы Наталья Спиридоновна Попова эттэ. Кини павильон тутуутун хаамыытын кэтээн көрөн, Анна Семеновна дьиҥнээх прораб буоларын итэҕэйбитин, бырааттара киниэхэ эрэллээх кынат буолалларын бэлиэтээтэ уонна түмэл өссө сайда турарыгар баҕарда, саҥа туллубут павильон быыстапка саалатын курдук туһаныллыа, дьон-сэргэ түмсэн ааһар сирэ буолуо диэн санаатын тиэртэ.
Павильон аһыллар лиэнтэтин Анна Семеновнаны кытта баһылык Ньургун Петрович Попов, түмэл дириэктэрэ Егор Дмитриевич Сорокоумов ытыс тыаһыгар доҕуһуоллатан быстылар.
Саҥа мас сытынан павильон бастакы ыалдьыттарын сэргии көрүстэ. Манна Уордьаннаах Сэмэн-Сэмэннэтэр төрөөбүтэ 100 сылыгар аналлаах дьиэтээҕи архыыптан бэртээхэй быыстапка тардыллыбыт. Манна кини уордьана, мэтээллэрэ, сэриигэ илдьэ сылдьыбыт кыракый блокнота, аймахтарыгар аналаах стендэлэр, Анна Семеновна аҕатыгар анаан таһаартарбыт кинигэлэрэ уо.д.а. дьон болҕомтотун тартылар. Ыалдьыттар итии чэйдээх остуол тула олорон, Анна Семеновна кэпсээнин иһийэн олорон иһиттилэр, эҕэрдэ тылларын эттилэр, ырыа-тойук да дьиэрэйдэ. Кэлбит дьон бары сүүйтэриитэ суох лотереяҕа оонньоон дьиэлэригэр илии тутуурдаах бардылар.
“Аҕабар иэспин чиэстээхтик толордум”, — диэн Анна Семеновна санаата бөҕөргөөн, сүргэтэ көтөҕүллэн туран эппитин бары да долгуйа иһиттибит.
Маннык үтүө, үйэлээх саҕалааһын салҕааччылардаах буолуо диэн эрэнэбит.
Наталья Попова, Елена Тотонова хаартыскаҕа түһэриилэрэ.