«Ангара» ХЭУо Амма аттыгар маһы соҕотуопкалааһын боппуруоһугар этиитэ
Георгий Викторович Маслобойников, «Ангара» ХЭУо дириэктэрэ:
— Саха сирин ытык-мааны олохтоохторо! «Ангара» ХЭУо кэлэктиибэ тулалыыр эйгэҕэ араас дьайыыны оҥорор тэрилтэлэри уопсастыбаннас оһуобай хонтуруолга ыларын саамай сөп диэн ааҕабыт. Дьон-сэргэ төрөөбүт төрүт айылҕаларын туһугар кыһаллаллара-мүһэллэллэрэ, ыалдьаллара олус үчүгэй, былаас эмиэ норуот туруорсуутугар сөптөөх болҕомтону ууран үлэлиир. Бу — былаас уонна норуот маһы соҕотуопкалыыр тэрилтэлэри кытта бииргэ утумнаахтык үлэлииллэригэр далаһа быраҕар. Өрөспүүбүлүкэ олохтоохторун туруорсууларынан маһы туһаҕа таһаарыы бырайыагар уларытыыны киллэрэн, өрүс кытыытынан маһы кэрдиини былаантан ылан кэбистибит. Онон өрүс кытыытыгар биир да маһы кэрдиэхпит суоҕа. Ойуур маһын туһаҕа таһаарар көннөрүллүбүт бырайыак судаарыстыбаннай бэрэбиэркэни ааһан (экспертиза) сөптөөх быһаарыы оҥоһулунна. Көҥүллэммит учаастакка чахчы сиппит-хоппут маһы эрэ соҕотуопкалыахпыт. Дэлээнэ маһын аҥаар кырыы, ол эбэтэр, эдэр, орто саастаах мастары кэрдиэхпит суоҕа. Кэрдибит сирбит аайы ойууру чөлүгэр түһэрэр сыалтан саамай хаачыстыбалаах мастары хаалларан сиэмэтин ыстарыахпыт. СӨ Экологияҕа министиэристибэтэ маһы соҕотуопкалааһыны, аренда дуогабарын ирдэбилин төһө тутуһарбытын-тутуспаппытын, баһаары утары, ойуур маһын чөлүгэр түһэрэр үлэлэри хайдах ыытарбытын барытын кыраҕытык көрөн хонтуруоллуохтара. Биһиги хампаанньабыт сокуону кэһэр ханнык да дьайыыны оҥоруо суоҕа. Олохтоох нэһилиэнньэни кытта биир тылы булан уонна баар сокуону кэспэт курдук үлэлиири мэктиэлиибит. Олохтоох нэһилиэнньэҕэ, булчуттарга, балыксыттарга, интэриэстээх да дьоҥҥо барыларыгар тэрилтэ маһы кэрдиигэ хайдах-туох үлэлиирин барытын быһааран кэпсииргэ бэлэммит. «Ангара» ХЭУо СӨ Экологияҕа, ойууру туһаныыга уонна ойуур хаһаайыстыбатыгар министиэристибэтигэр, Алдан оройуонун дьаһалтатыгар муниципальнай тэриллиилэри кытта хайдах үлэлиэхтээҕин былаанын оҥорон ыыппыта. Онно ойуур пуондатын территориятыгар баар бултанар сир-уот, эргэ нэһилиэктэр, кылабыыһалар, историческэй суолталаах сирдэр-уоттар бары учуокка ылыллыбыттара. “Ангара” ХЭУо өрөспүүбүлүкэ сайдыытыгар бэйэтин кылаатын киллэриэҕэ. Ол курдук, саҥа үлэ миэстэтинэн уонна социальнай бырагырааммабыт быһыытынан олохтоохтору уокка оттор маһынан, Аҕа дойду сэриитин кыттыылаахтарын, биэнсийэлээхтэри, элбэх оҕолоох дьиэ кэргэннэри тутуу матырыйаалларынан хааччыйыахпыт. Итини тэҥэ, атын улуустары пеллетинэн, тутуу матырыйаалларынан хааччыйыахпытын эмиэ сөп. Саха сирин ытык-мааны олохтоохторо, биһиги Эһигини кытта бииргэ көдьүүстээхтик үлэлииргэ бары өттүнэн бэлэммит. Онон «Ангара» ХЭУо үлэтигэр сыһыаннаах олуона иһитиннэриилэри итэҕэйбэккитигэр көрдөһөбүт. Биһиги хампаанньабыт үлэтэ өрөспүүбүлүкэ сайдыытыгар быһаччы оруолу ылыаҕа.
СӨ Экологияҕа министиэристибэтин пресс-сулууспата