Андрей Тарасенко: «Саха сирин сайдыыта өрүс уонна муора тырааныспара сайдыытын кытта ыкса ситимнээх»»
2020 сыл бастакы аҥаарыгар уу тырааныспарын тэрилтэлэрин үлэтин түмүктэрин туһунан СӨ бырабыыталыстыбатын бэрэссэдээтэлин э.т. Андрей Тарасенко мунньах ыытта.
Мунньахха тустаах министиэристибэлэр, биэдэмистибэлэр, тэрилтэлэр салайааччылара кытыннылар.
«Өрөспүүбүлүкэ сайдар, ону кытта тэҥҥэ уу тырааныспарын инфраструктуратын, логистикатын сайыннарыахтаахпыт, оччотугар улахан таһаҕаһы тиэйии түргэтиэҕэ», — диэтэ Андрей Тарасенко.
Сыллата Саха сиригэр навигация кэмигэр 3 мөлүйүөн туонна таһаҕас кэлэр, онтон 1 мөлүйүөн 238 тыһыынча туонната олоҕу хааччыйар таһаҕас буолар. Уу тырааныспарын хампаанньаларын дааннайдарынан, 2020 сыл бастакы аҥаарыгар 697,6 тыһыынча туонна таҕаһас тийэиллибит, бу 2019 сылга тиэйиллибит таһаҕас 97,2 %-на буолар эбит.
Тэрилтэлэр бэрэстэбиитэллэрэ бэлиэтииллэринэн, 2020 сылга уустук эпидемиологическай балаһыанньанан уонна хааччахтыыр миэрэлэринэн сибээстээн тиэйиллэр таһаҕас аччыыра буолуо диэн сабаҕалыыллар.
Андрей Тарасенко этэринэн, тырааныспар улахан инфраструктуратын таһынан суудуналар толору таһаҕастаах тиэллиилэрэ улахан оруоллаах. «Ночоотурбат туһуттан суудуналар таһаҕаһы толору тиэниэхтээхтэр», — диэтэ Тарасенко.
Андрей Тарасенко маны сэргэ таһаҕаһы тиэйэр уонна пассажирдары ылар причаллары өрөмүөннээһин, саҥардыы туһунан боппуруоһу көрүөх буолла.
Ил Дархан уонна Бырабыыталыстыба пресс-сулууспата.
Мария Васильева хаартыскалара, СИА.