Буолан ааспыт сахалыы атах оонньуутугар федерация Кубогар Таатта талыыта Андрей Васильев “куобахха” уон биир туоска 42 м 72 см түһэн, бэйэтэ олохтообут өрөспүүбүлүкэ рекордун тупсарда.
edersaas.ru
Үгэс буолбут күрэхтэһиигэ быйыл Уус Алдан, Чурапчы, Нам, Бүлүү, Сунтаар, Ньурба, Муома улуустарын итиэннэ “Модун” СК (Дьокуускай) хамаандалара илин-кэлин түһүстүлэр.
Биирдиилээн түмүккэ кыргыттарга — Сайыына Салышева (Уус Алдан), дьахталларга — Любовь Унарова (Дьокуускай), уолаттарга — Эдуард Догойдонов (Чурапчы), ыччаттарга — Айаал Иванов (Бүлүү), бэтэрээн эр дьоҥҥо Юрий Баженов (Уус Алдан) бастыҥ көрдөрүүлэннилэр.
Сытыы киирсии эр дьоҥҥо буолла. Манчаары Баһылай оонньууларын муҥутуур кыайыылааҕа Иван Пестряков (Уус Алдан) кылыыга 44 м 21 см көрдөрүүлэнэн бастаата. Владислав Попов (Нам, 43 м 40 см), Яков Дмитриев (Бүлүү-Кэбээйи, 43 м 35 см) иккис, үһүс буоллулар.
Ыстаҥаҕа Яков Дмитриев тэҥнээҕин булбата — 44 м 27 см. Иван Пестряков (42 м 95 см), Андрей Васильев (Ньурба-Таатта, 41 м 22 см) бириистээх миэстэлэргэ таҕыстылар.
Куобахха Андрей Васильевтыын куоталаһааччыларын ырааҕынан быраҕаттаата, эбиитин 42 м 72 см түһэн өрөспүүбүлүкэ рекордун тупсарда. Владислав Попов, Яков Дмитриев туһааннааҕынан 39 м 06 см уонна 38 м 82 см көрдөрүүлээх пьедестал иккис, үһүс үктэллэрин дабайдылар.
Үс көрүҥ түмүгүнэн Яков Дмитриев бастаата — 126 м 44 см. Андрей Васильев (125 м 02 см), Владислав Попов (123 м 29 см) үс бастыҥ иһигэр киирдилэр.
Быйылгы күрэхтэһиигэ Бүлүү хамаандата (тириэньэр Алексей Акимов) бастакы миэстэҕэ тахсан, федерация Кубогын илдьэ барда. Уус Алдан (Андрей Федоров), Чурапчы (Иван Чиркоев) спортсменнара иккис, үһүс буоллулар. Кыайыылаахтар өйдөбүнньүк бэлэхтэринэн, мэтээллэринэн, дипломнарынан биһирэннилэр.
Күрэхтэһиини үөрүүлээхтик арыйыыга спорт миниистирэ Иннокентий Григорьев сахалыы атах оонньуулара саҥа таһымҥа тахсыахтаахтарын эттэ. Онуоха бу күннэргэ Москваҕа түмүктэммит устудьуоннар ортолоругар чэпчэки атлетикаҕа Арассыыйаҕа бастыыр иһин күрэхтэһиигэ кыттан кыһыл көмүс, үрүҥ көмүс мэтээллэри ылбыт Хотугулуу-Илиҥҥи университет хамаандата сүрүннээн сахалыы атах оонньууларыгар Саха сирин, Арассыыйа маастардарыттан турара туһугар элбэҕи этэрин ыйда. Уонна федерация састааба саҥардыллыаҕын, көрдөрүүлэри үрдэтиигэ үлэ барыаҕын эттэ.
Роман Попов, edersaas.ru
Хаартыска Интэриниэттэн ылылынна.