Бүгүн, сэтинньи 16 күнүгэр, Дьокуускайга Уһук Илин федеральнай уокуругун “Биир ньыгыл Арассыыйа” эрэгийиэннээҕи отделениетын салайааччыларын уонна Саха сирин баартыйатын актыыбын сүбэ мунньаҕа саҕаланна.
“Биир ньыгыл Арассыыйа» баартыйа Генеральнай сэбиэтин сэкирэтээрин эбээһинэһин быстах кэмҥэ толорооччу Андрей Турчак, бу дуоһунаска анаммыта лоп курдук биир ыйын туолла.
“Манна кэлбит соруктарбыттан биирдэстэринэн эрэгийиэннээҕи баартыйалар салайааччыларын кытта билсиһии буолар – кими эрэ чугастык билэбин, сорохторун кытта билсиһиэм. Айаммын Саха сириттэн саҕалаабытым мээнэҕэ буолбатах. “Биир ньыгыл Арассыыйа” маннааҕы отделениета көдьүүстээхтик үлэлиирин көрдөрөн, баартыйа аатын-суолун үрдэтиигэ биллэр кылаатын киллэрэр”, – диэн бэлиэтээтэ “Биир ньыгыл Россия” Генсэбиэтин сэкирэтээрин эбээһинэһин толорооччу.
Кини бүгүн Дьокуускайга ыытыллыбыт сүбэ мунньахха баартыйа уларытан оҥоһуллуохтаах эбэтэр бөдөҥсүйүөхтээх бырайыактарын дьүүллэспиттэрин туһунан эттэ.
– Саха сиригэр куорат эйгэтин, тыйаатырдары, тыа сирин култууратын дьиэлэрин, спортивнай эбийиэктэри кытта ситимнээх бырайыактар көдьүүстээхтэрин көрдөрдүлэр. Маннык бырайыактар Уһук Илин атын эрэгийиэннэригэр эмиэ олоххо киирэллэр. Биһиги бүддьүөт чэрчитинэн 2019 сылга диэри балар үбүнэн өйөбүлү ылалларын ситиһэр соруктаахпыт, – диэтэ.
Андрей Турчак маны сэргэ “Биир ньыгыл Арассыыйа” үлэтин хайысхата эрэгийиэннэр диэки туһаайыллыбытын туһунан иһитиннэрдэ. “Биһиги маны регионнааҕы үгүс ахсааннаах бэрэстэбиитэл кыттыылаах баартыйа генеральнай сэбиэтин ротациялааһын нөҥүө ситиһиэхпит”, – диэн эбэн эттэ.
Сарсын “Биир ньыгыл Россия” Саха сиринээҕи отделениетын актыыбын кытта кулун тутар уонна балаҕан ыйдарыгар буолуохтаах быыбардарга бэлэмнэниини дьүүллэһиэхтэрэ. Маныаха баартыйа иһинээҕи куоластааһын муҥутуур аһаҕас буолара күүтүллэр.
Женни Стрюкова бэлэмнээтэ, edersaas.ru