“Биир ньыгыл Арассыыйа” политическай баартыйа Генеральнай сэбиэтин сэкирэтээрин эбээһинэһин толорооччу, Федеральнай мунньахха Федерация Сэбиэтин бэрэссэдээтэлин солбуйааччы Андрей Турчак бэҕэһээ, баартыйа Уһук Илин федеральнай уокурукка эрэгийиэннээҕи салааларын сэкирэтээрдэрин, ситэриилээх кэмитиэттэрин салайааччыларын мунньаҕын кэнниттэн, өрөспүүбүлүкэ Баһылыга Егор Борисовы кытары көрүстэ.
Андрей Турчак “Биир ньыгыл Арассыыйа” политическай баартыйа бырайыактарын олоххо киллэриигэ өрөспүүбүлүкэ таһаарыылаахтык үлэлиирин бэлиэтээтэ. Ол иһин баартыйа Уһук Илин федеральнай уокурукка регионнааҕы салааларын сэкиритээрдэрин, ситэриилээх кэмитиэттэрин салайааччыларын мунньаҕын ханна ыытар туһунан боппуруос турбутугар туох да саарбаҕа суох, демографической бэлиитикэ чэрчитинэн ыытыллар үлэ уопутун киэҥник билсэр сыалтан Дьокуускайы талбыттарын эттэ.
– Өрөспүүбүлүкэ бигэтик сайдар, социальнай инфраструктура кэлим бырайыактара олоххо киллэриллэр. Дьокуускайга бөдөҥ перинатальнай киин тутуута бүтэн эрэр. Бу нэһилиэнньэтин доруобуйатын харыстабылыгар дьоһун суолталаах хайысха, Президент Путин биһиги иннибитигэр туруорар соруга буолар. Саха Өрөспүүбүлэкэтигэр “Биир ньыгыл Арассыыйа” политическай баартыйа култуураҕа, оҕо спордугар, куораттары тупсарыыга, уһуйааннар дьиэлэрин тутууга туһуламмыт элбэх бырайыактара олоххо килэриллэллэр. Егор Афанасьевич, эһиги бу бырайыактарга улахан болҕомтоҕутун уураргыт иһин, икки мөлүйүөн чилиэннээх баартыйа аатыттан махтанабын, – диэтэ Андрей Турчак.
Салгыы Уһук Илин федеральнай уокурукка баартыйа тэрилтэлэрин үлэлэрин-хамнастарын иилииргэ-саҕалыырга анаан эрэгийиэннэр икки ардыларынааҕы сүрүннүүр сэбиэт (МКС) тэриллэрин туһунан эттэ. “Дьиҥинэн, Уһук Илиннээҕи эрэгийиэннэр икки ардыларынааҕы сүрүннүүр сэбиэт бүгүн бу манна, Саха сиригэр, тэрилиннэ” диэтэ.
Егор Борисов баартыйа бырайыагынан туох үлэ ыытылларын кылгастык билиһиннэрдэ. Быйыл, алтынньыга «Россия – Моя История» мультимедийнай историческай паарка үлэҕэ киирбитин, кэлэр сылга перинатальнай киин итиэннэ киин улуустары электроэнергиянан хааччыллыыларын күүһүрдүөхтээх ГРЭС иккис уочарата үлэҕэ киллэриллиэхтэрин эттэ.
– Быйылгы сыл үтүө түмүктээх ааһан эрэр. Бары социальнай-экономическэй параметрдар тутуһуллаллар, бородууксуйа баалабай оҥоһуута уонна экономикаҕа үбү угуу үрдээн иһэллэр. Оҕо төрөөһүнүн көрдөрүүтэ улаатар, өлүү аҕыйыыр, кэлиҥҥи 15 сыл устата нэһилиэнньэ ахсаана эбиллэр, – диэтэ Ил Дархан.
Нэһилиэнньэ кыра дохуоттаах араҥатын өйөөһүҥҥэ, Владимир Путин бүддьүөт үлэһиттэрин хамнастарын үрдэтэр туһунан ыам ыйынааҕы ыйааҕын олоххо киллэриигэ ыытыллар дьаһаллары билиһиннэрдэ. Өрөспүүбүлүкэ салалтата Россия Үбүн министиэристибэтин кытары өрөспүүбүлүкэ үс сыллаах бүддьүөтүн оҥорорго үлэлэһэ итиэннэ бүддьүөккэ нолуок киириитэ намтаабытын учуоттаан, эрэгийиэн бүддьүөтүн балаансатын хааччыйыы боппуруоһун дьүүллэһэ сылдьарын туһунан кэпсээтэ. Онуоха бары эрэгийиэннэргэ сыһыаннаах улахан боппуруоһу көтөхтө – нолуок систиэмэтэ уларытыллара наадатын бэлиэтээтэ. Тоҕо диэтэххэ, сир баайын хостооһун нолуога үрдэтиллибитин уонна нолуок саҥа көрүҥнэрэ киллэриллибиттэрин түмүгэр, хампаанньалар барыстарын көрдөрүүтэ намтатыллан, эрэгийиэннэр барыстан киирэр нолуогу ситэ ылбат буолбуттар.
Былаас баартыйатын баһылыгын эбээһинэһин толороччу Андрей Турчак өрөспүүбүлүкэ Ил Дарханын кытары көрсүһүүтэ ити курдук дьыалабыай уонна истиҥ быһыыга-майгыга буолла.
Раиса Сибирякова, “Саха сирэ” хаһыат, edersaas.ru