Андрей Турчак биһиэхэ дьоҕус авиацияны сайыннарыыга үлэлэһиэ
«Биир ньыгыл Арассыыйа» баартыйа Генеральнай сэбиэтин сэкирэтээрин эбээһинэһин толорооччу Андрей Турчак, кини солбуйааччыта, Судаарыстыбаннай Дуума дьокутаата Виктор Селиверстов уонна дьокутаат Евгений Ревенко бүгүн сарсыарда Дьокуускай куоракка кэллилэр.
Уһук Илин эрэгийиэнигэр биһиги өрөспүүбүлүкэбит дьоһун бэлитиичэскэй суолталаах буолан, Андрей Турчак эрэгийиэннэргэ дьыалабыай сырыытын Саха сириттэн саҕалаата. Турчак баартыйа 85 эрэгийиэннэрдээҕи салааларыгар барыларыгар сылдьар былааннаах.
Федеральнай дэлэгээссийэ күн бастакы аҥаарыгар Ил Дархан Егор Борисовы кытары көрүстүлэр. Ол кэнниттэн баартыйа салайааччыта олохтоох суруналыыстары кытары көрсөн, аҕыйах ыйытыыга хоруйдаата. Андрей Турчак Уһук Илин экэниэмикэтин уонна нэһилиэнньэ олоҕун тупсарыы баартыйа сүрүн сыалынан уонна соругунан буоларын бэлиэтээтэ.
– Дойду бэрэсидьиэнэ уонна бырабыыталыстыба бу боппуруоска сүрүн болҕомтолорун уураллар. Онон «Биир ньыгыл Арассыыйа» баартыйа эмиэ туора турбакка, бу хайысхаҕа үлэлэһэр былааннаах. Эһиги өрөспүүбүлүкэҕитигэр дьоҕус авиацияны сайыннарыы боппуруоһа сытыытык турар. Баартыйа олохтоох салаата бу хайысханан үлэлэһиэн наада. Бу туһунан биһиги Александр Ноговицыны кытары бүгүн кэпсэттибит, – диэн салгыы эбэн эттэ. Сэтинньи 17 күнүгэр дэлэгээссийэ Нам улууһугар айанныахтаах. Хамаҕаттаҕа спортивнай комплекс үлэтин билсиэхтээхтэр. Ол курдук, туһааннаах эбийиэк 2014 сыллаахха тутуллан, баартыйа спортивнай мал-сал атыылаһыытыгар 14 мөл. солк. көрбүтэ.