Ахсынньы 22 – 23 күннэригэр Москваҕа «Биир ньыгыл Арассыыйа» бэлитиичэскэй баартыйа сийиэһэ ыытыллыахтааҕын туһунан баартыйа Генеральнай сэбиэтин сэкирэтээрин эбээһинэһин толорооччу Андрей Турчак бэҕэһээ, суруналыыстары кытары көрсүһүү кэмигэр эттэ.
Турчак салайааччылаах оробуочай бөлөх Арассыыйа эрэгийиэннэригэр барыларыгар сылдьара былааннанар. Саха сирин кэнниттэн, салгыы Иркутскайга барыахтаахтар. Манна Сибиирдээҕи федеральнай уокурук бэрэстэбиитэллэрэ мустуохтара. Салехардааҕы көрсүһүүгэ баартыйа Ураллааҕы федеральнай уокуругун чилиэннэрэ кыттыахтара.
Баартыйа Саха сиринээҕи салаата таһаарыылаахтык үлэлии сылдьарын этэн туран: «Кулун тутарга федеральнай таһымнаах, оттон балаҕан ыйыгар эһиги өрөспүүбүлүкэтигэр быыбар хампаанньата ыытыллыахтаах. Онон сэтинньи 17 күнүгэр баартыйа активын кытары көрсөн кэпсэтиэхпит», – диэн Генеральнай сэбиэт сэкирэтээрэ бэлиэтээн эттэ.
Оттон «Биир ньыгыл Арассыыйа» Саха сиринээҕи салаатын сэкирэтээрэ Александр Ноговицын өрөспүүбүлүкэҕэ кэлбиттэригэр махталын тириэртэ уонна эрэгийиэннээҕи кэмпириэнсийэ ахсынньы 8 күнүгэр ыытыллыахтааҕын туһунан иһитиннэрдэ.
Анивера АКИМОВА, edersaas.ru