Уопсастыба

Андрей Тарасенко Жатайга тутуу хаамыытын көрдө

СӨ Бырабыыталыстыбатын бэрэссэдээтэлэ Андрей Тарасенко, солбуйааччы Дмитрий Садовниковы уонна тустаах министиэристибэлэри кытта Жатайга  федеральнай бырайыагынан, бырагырааманан тутулла турар эбийиэктэргэ сырыттылар, үлэ-хамнас хаамыытын билистилэр.

Көрбүт бастакы эбийиэктэрэ «Развитие судостроения и морской техники для освоения шельфовых месторождений» РФ бырагырааматын чэрчитинэн тутуллар Жатайдааҕы судоверфь буолла. Манна даҕатан эттэххэ, СӨ Ил Дархана Айсен Николаев тутуу кыраапыгыттан хаалыыны туоратарга эрдэ соруйан турар. Маныаха былааннаммыт кэмиттэн хаалыыны суох оҥорорго, «Жатайдааҕы судоверфь» АУо «Элтера» ХЭУо кытта бииргэ монтажтыыр үлэ кыраапыгын чочуйан биэрбиттэрэ. Күн ахсын үлэһиттэр ахсааннара элбээн иһэр, олохтоох каадырдар ыҥыраллаллар. Бүгүҥҥү күн туругунан тутууга 92 киһи үлэлиир,  үлэһит ахсаана үлэ кээмэйиттэн уонна матырыйаал кэлиититтэн көрөн кэҥиир, улаатар.

Генеральнай бэдэрээччит эбии тиэхиньикэни наймылаһыыга үлэлэһэр, оттон тиэхиньикэ сорох чааһа олохтоох хампаанньалартан бэриллиэ. Монтажка үлэни түргэтэтэр туһуттан собуот үлэһиттэр биригээдэлэрин командировкалыыр туһунан быһаарбыт.

Премьер-миниистир салгыы Жатайга канализационнай-ыраастыыр тутууну саҥалыы уларытан оҥоруу хаамыытын көрдө. Бэдэрээччит «Строительная компания «Сахастрой-2002» ХЭУо иһитиннэрбитинэн, үлэ кыраапык быһыытынан салҕанар.  Бастакы уочарата быйыл үлэҕэ киирэр.  Эбийиэги бүтүннүү киллэрии — 2022 сылга былааннанар. Билиҥҥи кэмҥэ  эбийиэккэ «СБОС» бетон истиэнэни уонна эркини бөҕөргөтүүнү монтажтааһын үлэтэ бүппүт. Бэлиэтэнэринэн, саҥардан оҥоруу кэнниттэн, тутуу кыамтата сууккаҕа 1500 м³ диэри ууну ыраастыыр кыахтаныахтаах, онтон туһаныллыбыт уу биологическай ыраастааһыны ааһыахтаах. Бөһүөлэккэ билигин баар 70-80-с сылларга тутуллубут ыраастыыр тутуулар хаарбах туруктаахтара ыйыллар. Оттон саҥалыы уларытан оҥоһуу Саха Өрөспүүбүлүкэтэ, «Жатай» куорат уокуруга, «Жатайтеплосеть» МУП уонна Дьокуускай к. «Водоканал» АУо концессионнай сөбүлэһиилэрин иитинэн ыытыллар.

СӨ Ил Дархан уонна Бырабыыталыстыба пресс-сулууспата

0
0