Саха сирин Бырабыыталыстыбатын бэрэссэдээтэлэ Андрей Тарасенко уонна Бырабыыталыстыба бэрэссэдээтэлин солбуйааччы Михаил Никифоров Уус Алдан улууһугар сүөһү аһылыгын бэлэмнээһин хампаанньатын хаамыытын көрдүлэр. Дүпсүн уонна Суотту сэлиэнньэлэригэр тыа хаһаайыстыбатын тэрилтэлэрин үлэһиттэрин кытта көрүстүлэр.
Улууска быйыл от үүнүүтэ лаппа мөлтөөн, уустук быһыы-майгы үөскээбит. Оттооһун хампаанньатын салгыы ыытар үлэлэр салҕаналлар. «Уус Алдан улууһугар от былаана — 32 000 туонна, онтон күн бүгүн 16 000 туонната бэлэм. Ону тэҥэ ыраах учаастактарга 2200 туонна кэриҥэ оту ылар былааннаах мобильнай биригээдэлэр үлэлииллэр», — диэн Андрей Тарасенко бэлиэтээн эттэ. Тиийбэт оту, ону сэргэ бурдугу Амур уобалаһыттан бу күннэргэ аҕалыахтаахтар.
Бу иннинэ Саха сирин Аҕа баһылыга Айсен Николаев сорудаҕынан, өрөспүүбүлүкэ Бырабыыталыстыбата Амур уобалаһыттан быйыл сүөһү аһылыгын аҕаларга дуогабар түһэрсибитэ. Саха сирин премьерэ Андрей Тарасенко салайааччылаах үлэлиир бөлөх Амур уобалаһын бырабыыталыстыбатын кытта ынах сүөһү уонна сылгы аһылыгын бэлэмнээһиҥҥэ көмө уонна 16 тыһыынча туонна оту оттуур ходуһалары туһаҕа биэрэр туһунан кэпсэтии ыыппыта.
Тыа хаһаайыстыбатын үлэһиттэрэ эдэр үлэһиттэр тиийбэттэрэ сүрүн кыһалҕанан буоларын ыйдылар. Тарасенко тыа хаһаайыстыбатыгар аналлаах үөрэхтэргэ эдэр дьону ыытыы, тыаҕа олорор эдэр дьону өйүүр бырагыраамалары кэҥэтэр оруннааҕар сөбүлэстэ.
Премьер бу этиллибит кыһалҕалары үлэҕэ-хамнаска көхтөөх кыттааччылары кытта көрсөн кэпсэттэ. Ыччат бэрэстэбиитэллэрэ эдэр исписэлиистэргэ, ол иһигэр учууталларга, агрономнарга дьиэ тутуутугар көмө ымпыгын-чымпыгын ырыттылар. Кинилэр ыччат тыаҕа хааларыгар, бу кыһалҕаны быһаары көдьүүстээх буолуоҕун этэллэр. Андрей Тарасенко бу ыйытыыны СӨ Тутуу министиэристибэтэ сиһилии ырытыаҕа диэн эрэннэрдэ, түргэнник тутуллар дьиэлэр бырайыактара көрүллүөхтээҕин туһунан кэпсээтэ.
Хаартыска: sakha.gov.ru