Андрей Тарасенко Усуйаанаҕа тиийдэ

Ааптар: 
Бөлөххө киир:

СӨ Бырабыыталыстыбатын Бэрэссэдээтэлин эбээһинэһин толорооччу Андрей Тарасенко бу күннэргэ Усуйаанаҕа тиийэн, улуус социальнай-экэнэмиичэскэй сайдыытын сүрүн хайысхаларын кытта билсиһэ сылдьар.

edersaas.ru

Андрей Тарасенко оробуочай сырыытын чэрчитинэн ОДьКХ уонна энергетика эбийиэктэригэр, чуолаан, бөһүөлэги барытын уунан хааччыйар «Поисковай» водохранилищеҕа сырытта. Соторутааҕыта эбийиэккэ хапытаалынай өрөмүөҥҥэ уонна саҥардан оҥоруу үлэлэрэ түмүктэммиттэрэ: турбалар, ититэр систиэмэтэ саҥардыллыбыттара, уларытыллыбыттара. Маныаха, «Сахаэнерго» үлэһиттэрэ уунан хааччыйыы биир технологическай турба көмөтүнэн ыытыллара кутталлааҕын бэлиэтээтилэр. “Хапытаалынай өрөмүөн ыытыллыбытын да кэнниттэн, бөһүөлэги хааччыйыы эмискэ тохтуур куттала баар буолуон сөп” диэн санааларын биллэрдилэр.

Билигин Депутатскайга ТЭЦ-кэ паровой хочуолунайы, паровой турбаны уонна көмө оборудованиены саҥардыы үлэтэ бара турар. Эһиил энергетиктэр саҥа хочуолунайы тутууга бырайыактыыр-чинчийэр үлэни ыытарга былааннаналлар. Санатан эттэххэ, 2020 сыл атырдьах ыйыгар Саха Өрөспүүбүлүкэтин баһылыга Айсен Николаев Депутатскайга саҥа хочуолунайы тутуу туһунан «РусГидро» АУо салалтатын кытта көрсүһүү ыыппыта.

Андрей Тарасенко оройуоҥҥа бырамыысыланнаһы сайыннарыы боппуруостарын эмиэ көрдө. Маныаха билигин өрөспүүбүлүкэҕэ көмүһү уонна хорҕолдьуну хостооһуҥҥа сүүһүнэн ахсааннах лиссиэнсийэ бэриллэр эрээри, чахчы үлэлиир тэрилтэ ахсааннаах.

«Маннык быһыыны-майгыны хааччахтыыр сыалтан, Росгеологияҕа биллэрэн лиссиэнсийэлэри ревизиялааһыны ыытарга күһэллэбит. Лиссиэнсийэ ылан баран үлэлээбэт тэрилтэлэртэн көҥүллэрин былдьыырга хадатаайыстыба түһэриэхпит», — диэбит Андрей Тарасенко.

Егор Карпов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0