Андрей Тарасенко: «Суолга туһаныллар матырыйааллары Саха сиригэр оҥоруохха»
Суол тутуутугар туһаныллар матырыйааллары аны Саха сиригэр оҥорор буолуохтара. Бырабыыталыстыба бу күннэргэ олохтоох хампаанньалар кыамталарын улаатыннарарга анал былааны оҥоруоҕа. Бу туһунан СӨ Бырабыыталыстыбатын Бэрэссэдээтэлэ Андрей Тарасенко иһитиннэрдэ.
Андрей Тарасенко Тырааныспар министиэристибэтигэр суолга туһаныллар тутуу матырыйаалларын оҥоруу тэхэньиичэскэй докумуонун бэлэмнииригэр сорудахтаата. Итинтэн сиэттэрэн, СӨ бырамыысыланнаска уонна тутууга министиэристибэлэрэ ырыынак билиҥҥи балаһыанньатын үөрэтэн көрөн баран, олохтоох оҥорон таһаарыыны хайдах-туох үрдэтэр туһунан этиилэрин киллэриэхтээхтэр. Бу быһаарыы олоххо киириитин бырабыыталыстыба бэрэссэдээтэлин бастакы солбуйааччы Дмитрий Садовников үүннүөҕэ-тэһиинниэҕэ.
«Билигин биһиги сүрүн сыалбыт-сорукпут — тутуу матырыйаалларын олохтоох хампаанньалар оҥороллорун ситиһии. Хампаанньалар ити хайысхаҕа көхтөөхтүк үлэһэллэригэр төһүү буолуохтаахпыт. Бүгүҥҥү күҥҥэ тутуу матырыйаалын үксүн өрөспүүбүлүкэ тас өттүттэн аҕалабыт. Ол эрээри, тустаах үлэҕэ туһанар матырыйаалларбыт Саха сиригэр эмиэ баар. Онон биһиги, үрдүттэн олорон, тугу эбии оҥоруохтаахпытын ырытан көрүөх тустаахпыт. Олохтоох тэрилтэлэр үлэлэтэри уонна кыамталарын улаатыннарары быһаарарбыт уолдьаста», — диэтэ Андрей Тарасенко.
Билигин Саха сирин үрдүнэн муостаҕа киириигэ 5300 миэтэрэ уһуннаах суол-иис оҥоһуллуохтаах. Манна үтүмэн элбэх щебень туһаныллара чахчы.
Ил Дархан Айсен Николаев арҕааҥы дойдулар сааҥсыйаларыттан сылтаан, тастан киириини солбуйар инниттэн олохтоох оҥорон таһаарыыны сайыннарыыга сөптөөх болҕомто ууруллуохтааҕын туһунан эрдэ тоһоҕолоон бэлиэтээн турар.
СӨ Ил Дарханы уонна Бырабыыталыстыбатын Пресс-сулууспата