Андрей Тарасенко үөрэх дьылыгар бэлэмнэниинэн улуустары кытта мунньах оҥордо

Саҥа үөрэх дьылыгар бэлэмнэнии боппуруоһунан бырабыыталыстыба бэрэссэдээтэлин эбээһинэһин толорооччу Андрей Тарасенко кыттыылаах мунньахха көрдүлэр. «Үөрэх дьыла преподавателлэргэ, төрөппүттэргэ, ону ааһан оҕолорго уустуга суох саҕаланара суолталаах. Пандемия кэмигэр баһаартан сэрэхтээх буолуу, оттукка бэлэмнэнии, учууталларынан хааччыйыы уонна оҕолору аһылыгынан хааччыйыы курдук суолталаах боппуруостары умнар табыллыбат», — диэн Андрей Тарасенко эттэ. Видео кэмпириэнсийэ быһыытынан барбыт мунньахха туһааннаах министиэристибэлэр, улуус баһылыктара, оскуола дириэктэрдэрэ кытыннылар.

Андрей Тарасенко хас биирдии улууһу истэн баран, балаҕан ыйын 1 күнүгэр бэлэмнэниигэ улахан үлэ барбытын, ол эрээри, чопчу хамсыктан сэрэтэр үлэ боппуруоһа аһаҕас турарын ыйда.

«Оҕолор биир кэмҥэ кэлиилэрин-барыыларын схематын ситэрэн, үөрэх тэрилтэтигэр сылдьыы алгоритмын өйдүүллэрин курдук, бастатан туран, төрөппүттэргэ уонна үөрэнээччилэргэ быһаарар ирдэнэр», — диэн бэрэссэдээтэл эбээһинэһин толорооччу дириэктэрдэргэ туһаайан эттэ.

Кыһалҕалары уталыппакка быһаарар туһугар бэрэссэдээтэл эбээһинэһин толорооччу, үөрэх управлениетын начаалынньыктарын кытта күннэтэ сибээстэһэргэ туһааннаах министиэристибэҕэ сорудахтаата.

СӨ бырабыыталыстыбатын бэрэссэдээтэлин солбуйааччытын эбээһинэһин толорооччу Сергей Местников рециркулятордары атыыласпыттарын кэннэ СӨ Үөрэҕин уонна наукатын министиэристибэтэ өрөспүүбүлүкэ бүддьүөтүттэн төнүннэриэҕэ диэн иһитиннэрдэ.

Миниистир Михаил Сивцев үөрэх хаамыытын ыытарга туһаайыллыбыт көрүҥнэр (модель) сүбэлиир эрэ аналлааҕын уонна улууска балаһыанньа хайдаҕыттан көрөн, хас биирдии оскуола бэйэтэ үөрэҕи аттарар бырааптааҕын бэлиэтээтэ.
Санитарнай-эпидемиологическай балаһыанньа үчүгэй сирдэригэр үөрэҕи үгэс быһыытынан ыытыахтарын сөп.

СӨ Ил Дарханын уонна барабыыталыстыбатын пресс-сулууспата