Андрей Тарасенко пиэрмэрдэри кытта улууска тыа хаһаайыстыбатын сайыннарыы боппуруостарын ырытта

Ааптар: 
Бөлөххө киир:

СӨ Бырабыыталыстыбатын бэрэссэдээтэлэ Андрей Тарасенко өрөспүүбүлүкэ пиэрмэрдэрин уонна тыа хаһаайыстыбатын кэпэрэтииптэрин кытта онлайн көрүҥүнэн пиэрмэрдэри сайыннарыы уонна өйөбүл миэрэлэрин туһунан кэпсэттэ.

edersaas.ru

Бырабыыталыстыба бэрэссэдээтэлэ билигин саамай кэмигэр уонна ойуур баһаарын туругун учуоттаан тыа хаһаайыстыбатын эйгэтин үлэһиттэрин өйүүр ирдэнэр диэн эттэ. “Эһигини өйүүрбүт суолталаах. Эһиги көннөрү бородууксуйаны эрэ биэрэр буолбатаххыт, дьону үлэнэн хааччыйаҕыт, үлэлиир сэлиэнньэҕит, куораккыт сайдарыгар кыаҕы биэрэҕит”, — диэн Андрей Тарасенко эттэ.

Мунньахха Саха сирин бааһынай хаһаайыстыбаларын (фермер) уонна кэпэрэтииптэрин ассоциациятын, уопсастыбаннай тэрилтэлэр бэрэстэбиитэллэрэ, Амма, Горнай, Нам, Сунтаар, Хаҥалас, Чурапчы улуустарын уонна Дьокуускай куорат хаһаайыстыбаларын уонна кэпэрэтииптэрин салайааччылара кытыннылар.

Бэрэстэбиитэллэр бүгүҥҥү үлэлэрин билиһиннэрдилэр уонна сүрүн уустуктарга бу курдук боппуруостары бэлиэтээтилэр: сүөһү аһылыга аҕыйаҕын, саҥа саҕалыыр пиэрмэрдэргэ тыа хаһаайыстыбатын туһалаах сирдэрэ тиийбэтин, куорат уокуругар дьиэ кэргэн пиэрмэрдэрин сайыннарарга грант эбэтэр субсидия суоҕун.

Мунньах кыттыылаахтара субсидияны уонна граны таһынан, пиэрмэрдэр уонна кэпэрэтииптэр оҥорон таһаарар, экэнэмиичэскэй көрдөрүүлэрин үрдэтиигэ административнай ноҕоруусканы намтатыы төһүү буолуон ыйаллар.

Сыл устата пиэрмэр нолуок уорганыгар, өрөспүүбүлүкэтээҕи уонна федеральнай биэдэмистибэлэргэ отчуот 46 пуорматын туттарара ирдэнэр. Анал үөрэҕэ суох пиэрмэргэ бу отчуоттары бэлэмниир өҥөнү төлүүрүгэр эбии ороскуоту таһаарар диэн бэлиэтээтилэр.

Бу уонна да атын боппуруостары Саха сиригэр пиэрмэрдэр хамсааһыннарын сайыннарар туһунан докумуон бырайыагын быһаарсыы иитинэн эбии көрүөхтэрэ. СӨ Ил Дархана Айсен Николаев сорудаҕынан ООН 2028 сылга диэри Дьиэ кэргэн пиэрмэрдэрин хаһаайыстыбатын сайыннарыыга биллэрбит уон сыллаах хамсааһын дириҥ былаанын олоххо киллэриигэ, Саха сирэ кыттыытын туһунан “дорожнай каарта” бырайыага оҥоһуллубут. Бу докумуон эрэгийиэҥҥэ пиэрмэрдэр хаһаайыстыбаларын сайыннарыыга сүрүн бэлиэнэн буолуохтаах. Докумуон быйыл атырдьах ыйыгар бэлэм буолуо диэн былаанныыллар.

Тыа хаһаайыстыбатын министиэристибэтэ иһитиннэрбитинэн, ыанар ынах ахсаанынан, сылгы төбөтүнэн, үүтү ыаһын баалабай көрдөрүүтүнэн пиэрмэрдэр хаһаайыстыбаларын өлүүлэрэ 30 бырыһыан үрдүк. Аһаҕас сиргэ үүнэр оҕуруот аһын үүннэриигэ аҥаарыттан элбэҕи уонна 20 бырыһыанынан хортуоппуйу, туорахтаах култуураны пиэрмэрдэр хааччыйаллар. Аһылык бородууксуйатын оҥорон таһаарыыга кэпэрэтииптэр өлүүлэрэ арыыга, чөчөгөйгө, сүөһү уонна сылгы тоҥ этигэр, джемҥэ уонна хомпуокка биллэр.

СӨ Ил Дарханын уонна СӨ Бырабыыталыстыбатын пресс-сулууспата.

+1
0
+1
0
+1
0
+1
0
+1
0
+1
0
+1
0