Андрей Тарасенко Өлүөхүмэ аграрийдарын үлэлэрин-хамнастарын билистэ

Ааптар: 
Бөлөххө киир:

Бырабыыталыстыба Бэрэссэдээтэлэ Андрей Тарасенко уонна тыа хаһаайыстыбатын миниистирэ Александр Атласов Өлүөхүмэҕэ оробуочай сырыыларыгар Өлүөхүмэ Амматыгар, Үҥкүргэ уонна Улахан Муҥкуга бааһынай хаһаайыстыбалар, кэпэрэтииптэр салайааччыларын кытары көрүстүлэр.

«Өлүөхүмэ кыладабыайа» ХЭТ ынах сүөһүнү иитэр улахан пиэрмэлээх итиэннэ астыыр кэмбинээттээх, онон үүт ас арааһын астаан нэһилиэнньэни хааччыйар. Субсидия үбүгэр тирэҕирэн, хаһаайыстыба былырыын үүт сыаҕын саҥардан оҥорбута, сыыр сыаҕын кэҥэппитэ уонна саҥа тэрили ылбыта. Ол түмүгэр үлэ көрдөрүүтэ тупсарыллыбыт. Андрей Тарасенко салааны утумнаахтык өйүүр көдьүүһэ көстөрүн, улуус туруктаахтык сайдарыгар тирэх буоларын бэлиэтээтэ.

Сиртэн үүнээйини ылыыга идэтийэр «Поиск» кэпэрэтиип 1000 гектарга ньэчимиэни, эбиэһи, сэлиэһинэйи ыспыт. Баазатын өссө тупсардаҕына, саҥа тиэхиньикэнэн сэбилэннэҕинэ, бурдугунан атын улуустары эмиэ хааччыйар кыахтаах эбит. Премьер эһиил бурдугунан өрөспүүбүлүкэни хааччыйар сыалтан, Тыа хаһаайыстыбатын министиэристибэтэ Өлүөхүмэҕэ бурдук комплексын саҥардыы бырайыагын оҥороругар сорудахтаата.

Хаһаайыстыбаларга сылдьыы кэнниттэн улуус дьаһалтатыгар тэриллибит сүбэ мунньахха эт-үүт, бурдук соҕотуопкатын мэхэньиисимин олоххо киллэрии, тырааныспар логистикатын боппуруостарын тула киэҥ кэпсэтии таҕыста. Биир тыын суолталаах боппуруос – мелиоративнай уонна гидротехническэй тутуулары чөлүгэр түһэрии – кэлин туспа көрүллэр буолла диэн Ил Дархан уонна Бырабыыталыстыба пресс-сулууспата иһитиннэрэр.

Раиса Сибирякова, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0