Андрей Тарасенко куорат таһынааҕы тыа хаһаайыстыбатын тэрилтэлэригэр сырытта
Саха сирин бырабыыталыстыбатын бэрэссэдээтэлэ Андрей Тарасенко тыа хаһаайыстыбатын министиэристибэтин салайааччыларын кытта үлэлиир тэрилтэлэри кэрийэ сылдьан сүбэ мунньах ыытта.
Премьер племенной сүөһүнү иитэр тэрилтэлэр үлэһиттэрин, Мархаҕа, Жатайга уонна Тулагыга оҕуруот аһын үүннэрээччилэри кытта көрүстэ.
«Сахаагроплем» хаһаайыстыбаҕа үүт хаачыстыбатын хонтуруоллуур лаборатория үлэтин кытта билистэ, боруода ынахтары искусственнай буоһатыы ыстаансыйатыгар тиийэ сырытта. Бу тэрилтэ лабораториятыгар сүөһүгэ генетическэй экспертиза оҥороллор, генетика өттүнэн туох итэҕэстээхтэрин тургутан көрөллөр. Бу тургутууга өрөспүүбүлүкэ бары улуустарыттан анаалыстар кэлэллэр.
Лаборатория үлэһиттэрэ кэпсииллэринэн, искусственнай буоһатыы ньыматынан ордук үрдүк таһаарыллаах, өлгөм бородууксуйаны биэрэр сүөһүлэри олохтоох боруодалары тупсаран таһаарарга үлэ ыыталлар. Ынаҕы, сылгыны уонна табаны боруода быһыытынан тупарыы үлэтэ бара турар.
Хортуоппуй уонна моркуоп олордуутунан дьарыктанар фермерскай хаһаайыстыба салайааччыта Владимир Кимы кытта мелиорация уонна тыа хаһаайыстыбаларын уунан хааччыйыы кыһалҕаларын ырыттылар. Бу кыһалҕалары сөптөөхтүк быһаардахха олордуу иэнин кэҥэтэн, Дьокуускай куорат олохтоохторугар уонна үөрэх кыһаларыгар өссө элбэх аһы биэриэн сөбүн туһунан тэрилтэ салайааччыта эрэннэрдэ. Билигин Ким хаһаайыстыбата 80 гектарга хортуоппуй, 13 гектарга оҕуруот аһын олордубут.
Андрей Тарасенко этэринэн, билигин Саха сирин Ил Дархана Айсен Николаев сорудаҕынан, тыа хаһаайыстыбатыгар үлэлиир дьону өйөөһүн саҥа ньымаларын үлэҕэ киллэрии ырытылла турар.
edersaas.ru
Хаартыска sakha.gov.ru