Андрей Тарасенко коронавируһу утары охсуһууга үлэлиир устудьуоннары кытары көрүстэ
СӨ бырабыыталыстыбатын бэрэссэдээтэлэ Андрей Тарасенко ХИФУ Мэдиссиинискэй институтун уонна Дьокуускайдааҕы мэдиссиинискэй кэллиэс үрдүкү куурустарыгар үөрэнэр устудьуоннары кытары көрүстэ. Бу устудьуоннар коронавируһу утары охсуһууга үлэлииллэр.
«Эһиги быраастары уонна мэдиссиинискэй сиэстэрэлэри кытары тэҥҥэ сылдьан өрөспүүбүлүкэ олохтоохторун доруобуйаларын бөҕөргөтүүгэ дьоһун кылааккытын киллэрэҕит. Онон бэйэбит ааппытыттан эһиэхэ дириҥ махталбытын тириэрдэбит», — диэн өрөспүүбүлүкэ премьерэ бэлиэтээн эттэ.
Устудьуоннар доруобуйа харыстабылын тэрилтэлэригэр, ол иһигэр «кыһыл зонаҕа» үлэлииллэр, сорохтор баҕа өттүнэн аһы-үөлү, эми-тому дьиэҕэ тириэрдиигэ сылдьаллар.
Көрсүһүүгэ салаа министиэристибэлэр, үөрэх тэрилтэлэрин бэрэстэбиитэллэрэ кыттыыны ыллылар. Мэдиссиинискэй каадырдары бэлэмнээһин, үөрэх кэнниттэн үлэнэн хааччыллыы боппуруостара көрүлүннүлэр.
«Өрөспүүбүлүкэ маннык ыччаттарынан киэн туттар. Салгыы даҕаны маннык үтүө суобастаах үлэлииргитигэр, саҥа ситиһиилэри баҕарабын. Биһиги куруук күүс-көмө буолуохпут», — диэн түмүккэ Андрей Тарасенко устудьуоннарга Махтал суруктары туттарарыгар эттэ.
СӨ Ил Дарханын уонна Бырабыыталыстыбатын пресс-сулууспата
+1
+1
+1
+1
+1
+1
+1