Саха сирин премьера Андрей Тарасенко бырабыыталыстыба бэрэссэдээтэлин солбуйааччы Михаил Никифоровы уонна норуот дьокутаата Михаил Эверстовы кытта Кэбээйи улууһун социальнай эбийиэктэрин көрдүлэр. Улуус баһылыгын солбуйааччы Александр Сивцев уонна нэһилиэк баһылыктара, социальнай эбийиэктэр салайааччылара буолан социальнай-экэнэмиичэскэй боппуруостары быһаарыстылар.
Бу туһунан Ulus.media иһитиннэрэр. Бастакы күҥҥэ дэлэгээссийэ Тыайа нэһилиэгэр сылдьан социальнай эбийиэктэри көрдө. Нэһилиэк олохтоохторун кытта көрүстүлэр. Олохтоохтор оскуола уонна оҕо саадын тутуутун туһунан боппуруоһу бырабыыталыстыба бэрэссэдээтэлигэр биэрдилэр. Тыайа оскуолатын дьиэтэ хаарбах туруктааҕынан биллибит, оттон оҕо саада олус эргэ. Андрей Тарасенко бэлиэтээбитинэн, кэмигэр өрөмүөн үлэлэрэ оҥоһуллаллар эбит. Маны сэргэ, Тыайа уонна Кэбээйи икки ардынааҕы айан суолун оҥоруу , Луҥха үрэҕи туоруур муоста тутуута уонна эдэр исписэлиистэргэ дьиэ тутуутун туһунан ыйытыылар киирдилэр.
Билигин Саха сирин үрдүнэн муҥха кэмэ. Ол иһин ыалдьыттары муҥха кэмигэр түбэһиннэрэн ыҥырбыттар. Кэбээйи собото — улуус брендэ. Кэбээйи собото эмиһинэн уонна битэмииннээҕинэн биллэр. Дэлэгээссийэ чилиэттэрэ муҥхаҕа сырыттылар. Тыайа кэнниттэн Кэбээйи сэлиэнньэтигэр сырыттылар. Ыалдьыттар олохтоохтору кытта көрүстүлэр. Бу көрсүһүүгэ оҕо саадын тутуутун туһунан боппуруос көтөҕүлүннэ. Билиҥҥи туругунан 197 мөлүйүөннээх смета докумуона оҥоһуллан бэлэм сытар, ол эрээри биир да бырагыраамаҕа киирбэтэх. Күөллэр уолан хааланнар Кэбээйи олохтоохторун сүрүн кыһалҕатынан ииһэр уу буолбут.
Кэбээйи улууһа оттуур ходуһаларынан биллэрэ. Турбаахы диэн сир саамай хойуу оттоох сиринэн биллэр. Өрөспүүбүлүкэ салалтатыгар Кэбээйи сиригэр-уотугар сүөһү эбии аһылыгын саппааһын пуондатын тэрийии туһунан этии киирдэ. Андрей Тарасенко бу этиилэри тустаах министиэристибэлэргэ көрүүгэ биэрэр туһунан эттэ. Улууска социальнай эбийиэктэри тутуу сайдыы суолун кэрэһилиир. Дэлэгээссийэ үлэтинэн улууска сырыыта ситиһиилээх, түмүктэрдээх буолла. Икки маннык көрсүһүү ахсынньы ыйга былааннанар.
Ульяна ЗАХАРОВА.