Андрей Тарасенко Өймөкөөн улууһугар көмүс хостуур тэрилтэлэр салайааччыларын кытта көрүстэ
Өймөкөөн улууһун баһылыга Иннокентий Сивцев көҕүлээһининэн, бэс ыйын 16 күнүгэр, СӨ Бырабыыталыстыбатын бэрэссэдээтэлэ Андрей Тарасенко Өймөкөөн улууһугар көмүс хостуур тэрилтэлэри кытта киэҥ ыҥырыылаах мунньаҕы ыытта.
Сүрүн боппуруос — улуус социальнай-экэнэмиичэскэй сайдыытыгар көмүс хостуур тэрилтэлэр өйөбүллэрэ. Өймөкөөн улууһун сиригэр-уотугар үлэлиир көмүс хостуур тэрилтэлэр үлэлэрин туһунан СӨ Бырамыысыланнаска уонна геологияҕа миниистирэ Максим Терещенко билиһиннэрдэ. Көмүс хостуур тэрилтэлэри кытта бииргэ үлэлээһин туһунан Өймөкөөн улууһун баһылыга Иннокентий Сивцев кэпсээтэ.
» Мунньахха олохтоох бүддьүөккэ 2019 — (1-кы кыбартаал) — 2021 сылларга көмүс хостуур тэрилтэлэртэн нолуокка киирбит үбүлээһини билиһиннэрдим. Маны таһынан, улууска быһаарыылаах боппуруостары эрэйэр ОДьКХ, суол, сибээс, тутуу салааларын таарыйдым. Мунньахха этиллибит боппуруостарынан тустаах министиэристибэлэргэ уонна биэдимистибэлэргэ Андрей Тарасенко сорудахтары биэриэҕэ. Мунньах түмүгэр
улуус сиригэр-уотугар көмүс хостуур тэрилтэлэр салайааччылара Өймөкөөн оройуонун социальнай-экэнэмиичэскэй сайдыытыгар туһуламмыт Сөбүлэҥнэри эбэтэр Эбии сөбүлэҥнэри б.дь. от ыйын 15 күнүгэр диэри түһэрсэллэригэр сорудахтанна.
Киэҥ ыҥырыылаах мунньахха кыттыыны ылбыт СӨ Федеральнай нолуок сулууспатын Саха сиринээҕи салаатын салайааччыта Алёна Фёдорова Өймөкөөн улууһа нолуок сулууспатын кытта нолуокка киирбит дохуоту түмүүгэ «Дорожнай каартаны» өрөспүүбүлүкэҕэ бастакынан оҥорбутун бэлиэтээтэ», — диэн кэпсээтэ улуус баһылыга Иннокентий Сивцев.
Өймөкөөн улууһун сиригэр-уотугар көмүс хостуур тэрилтэлэр үлэлэрин туһунан сиһилии — «Саха сирэ» хаһыат кэлэр чэппиэрдээҕи нүөмэригэр ааҕыҥ.
Елена ПОТОЦКАЯ, «Саха сирэ» хаһыат, edersaas.ru