Бырабыыталыстыба бэрэссэдээтэлэ Андрей Тарасенко тыа хаһаайыстыбатын боппуруостарынан, кыстыкка бэлэми көрө-истэ Мэҥэ Хаҥаласка сырытта.
edersaas.ru
Балаҕан ыйын 8 күнүгэр күн бастакы аҥаарыгар Уус Алдан улууһугар сылдьан баран, күн иккис аҥаарыгар үлэтин Мэҥэ Хаҥалас улууһугар салҕаата. Бастаан “Тумул” кэпэрэтиип бааһынатыгар сылдьан, бурдук үүнүүтүн көрдө. Манна кинини хаһаайыстыба кылаабынай агронома Тимур Десяткин көрүстэ.
Бурдук үүнүүтэ кураантан сылтаан мөлтөх да буоллар, үүнэн турар таһыма орто үүнүүгэ Илин эҥэр усулуобуйатынан киирсэр диэн Андрей Владимировичка быһаардылар. Хаһаайыстыба агронома ыһыы хампаанньатыгар киириигэ үбүнэн көмө наадатын эттэ. Дьүөрэлэһиннэриллибит састааптаах эбии аһылыгы бэлэмниир собуоту үлэлэтиэхтээхтэрин эппитин сэргии иһиттэ. Сиэмэ бурдугу, уоҕурдууну, уматыгы, оҕунуоҕу, саппаас чаастары атыылаһарга элбэх ороскуоту көрсөллөр. Эргэрбит тиэхиньикэ туһаттан тахсан иһэр. Саҥаны атыылаһарга үп-харчы суох. Былааҥҥа гааттан 10 сэнтиниэри 550 туоннаҕа суоттанан аахпыт буоллахтарына, үлэ хаамыыта 380 туоннаҕа суоттаныыга түһэрэн, гааттан 7-8 сэнтиниэри ылыахтарын сөбүн сабаҕалыыллар. Андрей Тарасенко үбүнэн-харчынан кимнээххэ көмө оҥоһуллара наадатын чуолкайдаан, ааҕан-суоттаан көрөр наадатын эттэ. Улуус быйыл бурдук хаһаайыстыбаларыгар анаан 300-түү туонна эрэ сиэмэ эбиэһи, сэлиэһинэйи, нэчимиэни атыылаһар кыахтаах. Ардаҕы түһэрии боппуруоһун көтөхтүлэр. Өрөспүүбүлүкэ салалтата итиннэ үлэлэһэрин Бырабыыталыстыба Бэрэссэдээтэлэ тиэртэ. Ол гынан, ардаҕы түһэрэргэ былыттар баар буолуохтарын наада.
Төҥүлүгэ Андрей Тарасенко “Хоту” кэпэрэтиип эбийиэктэригэр сырытта. Бастаан сүөһүнү өлөрөр пууҥҥа. Нэһилиэк баһылыга Гаврил Данилов уонна кэпэрэтиип дириэктэрэ Иван Максимов туттарыллар үүт төлөбүрүн туһунан быһаардылар. Эттэн уонна үүттэн оҥоһуллар бородууксуйаларын көрдөрдүлэр. Ити күнүнэн, барыта 32 сүөһүнү тутан астаан сылдьаллар эбит. Пуун кэнниттэн кэпэрэтиип үрүҥ ас кэмбинээтигэр ыалдьыттаттылар. Ыраастаммыт ууну куталларын кэпсээтилэр. Билиҥҥи көмөлөр бырагыраамалара баар буоланнар, эдэрдэр тыа хаһаайыстыбатыгар хаһаайыстыба тэринэргэ ылсар чахчылара баалларын ыйдылар. Бородууксуйаны батарыы боппуруоһа сытыытык турарын Иван Максимов эттэ, “Сахаагропродукт” кэпэрэтиип атаҕар туран биэримээри гынна диэн ыйда.
Төҥүлүттэн Майалаан иһэн, Андрей Тарасенко Билир сайылыкка олорор икки бааһынай хаһаайыстыбаҕа сырытта. Сайылыкка Андрей Тарасенко, уу боппуруоһа уустугун истэн, нэһилиэктэргэ, хаһаайыстыбаларга сир аннынааҕы уунан хааччыллыы наада эбит диэн өйдөөбүтүн тиэртэ. Уу таһар массыыналар өрөспүүбүлүкэҕэ баһаарынай сулууспа нөҥүө аҕалыллан тарҕатыллыахтаахтарын иһитиннэрдэ. Мелиорацияҕа үбү тыырыыга үлэлэһии туһунан норуот дьокутаата Андрей Находкины кытта кэпсэттилэр. Өлүөнэ уутун ситэри туһаныы кыалла илигин Бырабыыталыстыба Бэрэссэдээтэлигэр эттилэр. Нөмүгү учаастакка электроуот ситимин боппуруоһа быһаарылла олох чугаһаан баран, “тоҥоруллан” турарын киниэхэ кэпсээбиттэрин сэргээн иһиттэ. Энергетиктэргэ элбэх ыйытыы мунньулунна диэтэ.
Салгыы “Чүүйэ” муниципальнай унитарнай хаһаайыстыбаҕа сылдьан, сиилэс оҥоһуллуутун кытта билистэ. Хаһаайыстыба салайааччыта Святослав Кириллин сүөһү иитэр комплекс өрөмүөҥҥэ наадыйарын, төрүүр-ууһуур сүөһүлэр сааһыраннар, хаан саҥардыыта наада буолбутун туһунан кэпсээтэ.
Киэһэ Андрей Тарасенко Амма улууһугар айаннаата.
Майаттан Аркадий Иннокентьев, «Саха сирэ» хаһыат, edersaas.ru сайтка анаан