Андрей Тарасенко Хаҥаласка социальнай кииҥҥэ оҕолорго бэлэх туттартаата
Хаҥаластааҕы социальнай-чөлүгэр түһэрэр киин иитиллээччилэрэ саҥа дьыллааҕы бэлэхтэри туттулар.
СӨ Бырабыыталыстыбатын бэрэссэдээтэлэ Андрей Тарасенко уонна үлэ, социальнай сайдыы миниистирэ Елена Волкова Хаҥалас улууһугар социальнай-чөлүгэр түһэрэр кииҥҥэ сылдьан оҕолорго саҥа дьыллааҕы бэлэхтэри туттардылар.
Киин дириэктэрэ Юлия Исмакова ыалдьыттарга киин үлэтин-хамнаһын уонна ааһан эрэр сыл түмүктэрин билиһиннэрдэ. Ыалдьыттар оҕолорго минньигэс бэлэхтэри туттартаатылар, оттон оҕолор ыалдьыттарга анаан бэйэлэрэ оҥорбут харыйа оонньуурдарын бэлэх ууннулар. Хаҥалас улууһун сааһын ситэ илик оҕолорго аналлаах социальнай-чөлүгэр түһэрэр киин элбэх оҕолоох ыалга уонна сааһын ситэ илик оҕолорго социальнай өҥөнү оҥорор тэрилтэ буолар. Чуолаан уустук балаһыанньаҕа түбэспит дьиэ кэргэҥҥэ, ону сэргэ социальнай көмөҕө, өйөбүлгэ наадыйар дьону кытта үлэлэһэр. Манна Хаҥалас улууһугар олорор дьон, чуолаан ыарахан, сэрэхтээх балаһыанньаҕа түбэспит оҕолорго көмөлөһөр. Бырабыыталыстыба бэрэссэдээтэлэ Андрей Тарасенко киин үлэтин тэрээһиннээҕин уонна үтүө түмүктэрдээҕин бэлиэтээтэ.
Ульяна ЗАХАРОВА.