Сүүрүүнэн дьарыктанар Изабелла Борисова Арассыыйаҕа сверхмарафоҥҥа кыттан дойдутугар кыайыы көтөллөөх эргилиннэ. Николай Кобяков, Айаал Макаров, Василий Алексеев уонна Рамир Николаев спортиҥҥа Европа чөмпүйэнээтиттэн араас мэтээллэри аҕалары ситистилэр.
Итинэн Саха сирэ чэпчэки атлетикаҕа оскуолаларынан уонна кыраҕы харахтаах бэргэн ытааччыларынан күүстээҕин туоһулаата. СӨ Бырабыыталыстыбатын бэрэссэдээтэлэ Андрей Тарасенко спортсменнары ситиһиилэринэн эҕэрдэлээтэ уонна сэртипикээттэри туттарда. Бу туһунан СИА иһитиннэрэр.
«Хайдахтаах үчүгэйий, иһитиннэрэр-биллэрэр маассабай сириэстистибэлэр биһиги спортсменнарбыт ханна эрэ күрэхтэһиилэргэ тиийэн кыайбыттарын-хоппуттарын иһитиннэрэ олороро. Мин СӨ Ил Дарханын уонна бырабыыталыстыба аатыттан эһигини ситиһиигитинэн эҕэрдэлиибин, успуорка ситиһиилэри, кыайыыны-хотууну баҕарабын. Эһиги өрөспүүбүлүкэ аатын ааттатаҕыт, кыайыыларгытынан биһиги киэн туттабыт уонна үүнэр көлүөнэҕэ эрэлбит улаатар. Саха сирин дьоһуннук ааттатаргыт иһин улахан махталбын тиэрдэбин«, — диэн Андрей Тарасенко пресс-кэмпириэнсийэҕэ спортсменнарга туһаайан эттэ.
Успуорт миниистирэ Иннокентий Григорьев марафоҥҥа оскуола тэрийэр туһунан этии киллэрдэ. Кини
сверхмарафоҥҥа аан дойду үс төгүллээх чөмпүйүөнэ, тириэньэр Татьяна Жиркова настаабынньык быһыытынан улахан ситиһиилэрдээҕин — марафоҥҥа Арассыыйа биэс төгүллээх чөмпүйүөнэ Сардана Трофимова, Изабелла Борисова түмүктэри көрдөрүүтүн саҕалаабытын, профессиональнай былааҥҥа атын да иитиллээччилэрэ үүнэн-сайдан эрэллэрин бэлиэтээтэ.
«Арассыыйа чөмпүйэнээтигэр кыһыл көмүһү ылар олус уустук этэ. Бу мин эрэ кыайыым буолбатах, бу — бүтүн улахан хамаанда үлэтэ. Түгэнинэн туһанан, Уус Алдан улууһун баһылыгар Алексей Федотовка уонна успуорт управлениетын салайар Константин Давыдовка миэхэ эрэммиттэригэр уонна өйөөбүттэригэр махталбын тиэрдэбин. Маны сэргэ, успуорка бэлэмниир киин мединицаҕа персоналыгар, тириэньэрбэр Татьяна Жирковаҕа махтанабын«, — диэтэ Изабелла Борисова.
Спортсменка настаабынньыга Кисловодскайга ый устата эрчиллибиттэрин, бэлэмнэммиттэрин сырдатта. Күрэхтэһиигэ улахан үөрүйэхтээх 40 спортсменка кыттыбыт, олор ортолоругар норуоттар икки ардыларынааҕы кылаастаах маастардар кытары бааллар ын эттэ.
«Изабелла маастарыстыбатын көрдөрдө, кини дьүккүөрдээҕиттэн, тулуурдааҕыттан наһаа үөрдүм. Өссө төгүл биһиэхэ саамай тулуурдаах кыргыттар олороллорун дакаастаатыбыт. Иннокентий Юрьевич эппитин курдук, марафонецтарга анаан оскуола арыйар кэм кэллэ дии саныыбын. Биһиэхэ Сардаана Трофимова — марафоҥҥа биэс төгүллээх чөмпүйүөн, аны билигин сверхмарафонецтарбыт бардылар, иннибитин кимиэхэ да биэриэхпит суоҕа!» — диэтэ Татьяна Жиркова.
Европа чөмпүйүөнэ Николай Кобяков кинилэри өйөөбүт дьоҥҥо барыларыгар махтанна. Кини ытыыга Саха сирин оскуолата биир саамай күүстээҕинэн буоларын өссө төгүл дакаастаата диэн этэр. Европаҕа бастыыр иһин күрэхтэһии кыайыылааҕа Рамир Николаев турнирга юниордарга күүстээх утарылаһааччылар түмсүбүттэрин бэлиэтээтэ. Түһүлгэҕэ киниттэн аҕа саастаахтар бааллар эбит, ол гынан баран, биһиги бэргэн ытааччыбыт инники күөҥҥэ дьулуурдаахтык өтөн тахсыбыт.
«Кыһыммыт манна тымныы буолан, сылаас дойдуттан кэлбит утарылаһааччыларбытын кытары тэҥнээтэххэ, биһиги соччо дьарыктамматахпыт. Ол гынан баран, хамаандабыт сөҕүмэр ситиһиилэннэ. Николай уһулуччу үчүгэйдик кытынна. Мин аан дойду хас да төгүллээх чөмпүйүөнүгэр сабырыйтаран үһүс буоллум. Хамаанданан эрэллээхтик бастаатыбыт. Кэлэр да өттүгэр күрэхтэһиилэр элбэхтэр, онон өрүүтүн да бу курдук кыһаллар буолуохпут. Ыччат үүнэн-сайдан тахсан эрэр. Успуорт министиэристибэтин уонна успуорка бэлэмнээһин киинин кытта бииргэ элбэҕи ситиһиэхпит«, — диэтэ успуорт үтүөлээх маастара Айаал Макаров. Саха сирин бэргэн ытааччыларыгар наҕараадалары дойдулаахтара уонна СӨ спортинг федерацията туттарда.
Мария Васильева (СИА) хаартыскаларга түһэриитэ
