Бүгүн СӨ Бырабыыталыстыбатын Бэрэссэдээтэлэ Андрей Тарасенко Дьокуускайдааҕы килиэби астыыр кэмбинээккэ сылдьан үлэни-хамнаһы, былааны билистэ.
Кэмбинээт генеральнай дириэктэрэ Светлана Кынакытова иһитиннэрбитинэн, аһы-үөлү батарыы үс ханаалынан барар: кууһунан атыылаһааччылар — 73 %, бэйэ атыылыыр тиһигэ — 23 % уонна бүддьүөт тэрилтэлэрэ — 3%. 2020 сыл 11 ыйынааҕы түмүгүнэн, Дьокуускай куоракка килиэби-буулканы астааһыҥҥа кэмбинээт өлүүскэтэ 79,7% ылар.
2020 сылга 1 сортаах сэлиэһинэйтэн оҥоһуллубут килиэби ылыы аччаабыт. Оттон мээккэлэммит хара бурдуктан оҥоһуллубут килиэп атыыта улааппыт. Маннык көстүү дойду үрдүнэн дьон доруобуйатыгар болҕомтотун уурар, кыһаллар буолбутун мэктиэлиир. Кондитерскай аска, пандемия кэмигэр киин сиргэ уопсай үөрэхтээһин тэрилтэлэрэ «сухой паекка» бичиэнньэлэри, бирээнньиктэри ылыылара улааппыта бэлиэтэнэр.
2021 сылга атыы-тутуу көдьүүстээхтик тэриллиитин үрдэтиигэ улахан болҕомто ууруллар. Маны сэргэ, 2021-2025 сылларга кэмбинээт үлэтин сайыннарарга саҥа стратегическай былааны оҥоруу түмүктэнэн эрэр.
Бырабыыталыстыба Бэрэссэдээтэлэ кэмбинээт үлэтин-хамнаһын сиһилии билэн-көрөн баран, баан кирэдьиитин бырыһыанын аччатыыга үлэ ыытыллара наадатын бэлиэтээтэ, ону таһынан, хааччыйааччылары кытары үлэ бириинсибин хаттаан көрөр, бурдугу аҕалыыга логистикаҕа болҕомтону уурар наадатын эттэ.
СӨ Ил Дархан уонна Бырабыыталыстыба пресс-сулууспата
+1
+1
+1
+1
+1
+1
+1