Федеральнай Мунньахха туһаайан Анал этиитигэр бэрэсидьиэн Владимир Путин судаарыстыба социальнай хайысхалааҕын бигэргэтэн, үп-харчы өттүнэн ыарахан балаһыанньалаах, оҕолоох дьиэ кэргэттэргэ көмөлөһөр бэлиитикэтин салгыырын туһунан иһитиннэрдэ. Ол курдук, от ыйын 1 күнүттэн кэккэ миэрэлэр ылыныллыахтара.
— Владимир Путин дьадайыыны утары уонна оҕолоох дьиэ кэргэттэр дохуоттара улаатарын туһугар быһаччы көмөлөөх миэрэлэри ылынар туһунан эттэ. Саха сирэ бу маннык миэрэлэри көхтөөхтүк үлэлэтэр эрэгийиэннэр истэригэр киирсэр, — диэн СӨ бырабыыталыстыбатын бэрэссэдээтэлэ Андрей Тарасенко эттэ.
2020 сылга тиийинэн олоруу алын кээмэйиттэн намыһах дохуоттаах ыаллар (дьиэ кэргэн хас биирдии чилиэнигэр тиксэринэн), ортотунан 9,4 тыһыынча солкуобай көмөнү ылбыттара. Ааспыт сыл устата барыта 47 849 оҕоҕо 36 110 тыһыынча сайабылыанньа көрүллэн, 4 миллиард солкуобай кэриҥэ суумалаах төлөбүр оҥоһуллубута.
Бырабыыталыстыба бэрэссэдээтэлэ эппптинэн, 2021 сылга төлөбүр кээмэйэ дьиэ кэргэн дохуотуттан уонна ханна олороруттан тутулуктаах буолуоҕа. Холобур, 3-7 саастаах оҕолорго босуобуйа кээмэйэ хотугу улуустарга 11-21 тыһыынча солкуобайга, атын улуустарга – 9-18 тыһыынча солкуобайга тэҥнэһиэ.
Бэрэсидьиэн федеральнай Ийэ хапытаала 2026 сылга диэри уһуурун уонна кэҥиирин туһунан иһитиннэрдэ. Бастакы оҕо төрөөтөҕүнэ эмиэ биэрэр буоллулар. 2020 сылтан кээмэйэ үрдээбитэ: бастакы оҕоҕо – 466 тыһыынча солкуобай, иккис оҕоҕо – 616 тыһыынча солкуобайга тэҥнэспитэ.
— Биһиги дьиэ кэргэттэри өйүүргэ көрүллэр үп-харчы кээмэйин былааннаахтык улаатыннаран иһэбит. 2019 сылга 4,4 миллиард солкуобай көрүллүбүт эбит буоллаҕына, 2020 сылга – 10,5 миллиард солкуобай, 2021 сылга – 12,2 миллиард солкуобай (федеральнай бүддьүөттэн – 9,6 миллиард солкуобай, өрөспүүбүлүкэттэн – 2,5 миллиард солкуобай) көрүллүбүтэ, — диэн премьер бэлиэтээн эттэ.
Ангелина Васильева, “Саха сирэ” хаһыат, edersaas.ru