Бэлиитикэ Маны аах Тыа хаһаайыстыбата

Андрей Тарасенко Дьааҥыга тыа хаһаайыстыбатын үлэһиттэрин кытары көрүстэ

Бырабыыталыстыба бэрэссэдээтэлэ Андрей Тарасенко Дьааҥыга оробуочай сырыытыгар тыа хаһаайыстыбатын үлэһиттэрин кытары көрүстэ.

 

Бастатан туран, премьер улуус саамай бөдөҥ хаһаайыстыбатын, 307 ынах сүөһүлээх «Алгыс» кэпэрэтиип үлэтин-хамнаһын билистэ. Кэпэрэтиип салалтата 120 ыанар ынахха анаммыт толору хааччыллыылаах комплексы туттараары, бырайыак оҥорторбута билигин судаарыстыбаннай экспертизаҕа сылдьар эбит. Санатан эттэххэ, Ил Дархан Айсен Николаев сорудаҕынан, маннык комплекстар тутууларыгар өрөспүүбүлүкэ бүддьүөтүттэн субсидия көрүллүөхтээх.

Салгыы Андрей Тарасенко «Тымныы полюһа» уонна «Яна-Продукт» кэпэрэтииптэр, «Бадайагро» тэрилтэ салалтатын кытары көрсөн, астыыр тэрили саҥардыыга тула кэпсэттэ, Улахан Сыһыы ходуһатыгар сырытта.

Дьиэ кэргэн экономикатын бөҕөргөтүү чэрчитинэн, улууска 95 сибиинньэ оҕото, ол эбэтэр былааннаммыттан 75 төбөнөн элбэх боросуонак аҕалыллыбыт. Оттон куурусса ситэ аҕалыллыбатах, сайаапка быһыытынан 150 куурусса аҕалыллыахтаах эбит. Көрсүһүүгэ биллибитинэн, дьон куурусса ииттиэн баҕарар эбит.

– Түргэнник ситэр салааны улуустарга тиэрдиигэ бүддьүөттэн 55 мөл. солк. көрүллүбүтэ, Арктика улуустарыгар тиэйии-таһыы ороскуота толуйуллар. Онон, кууруссаны аҕалыы былаана толоруллуохтаах, – диэтэ Андрей Тарасенко улуус дьаһалтатыгар диэн Ил Дархан уонна бырабыыталыстыба пресс-сулууспата иһитиннэрэр.

Раиса Сибирякова, «Саха сирэ», edersaas.ru

0
1