Бүгүн Саха Өрөспүүбүлүкэтин Бырабыыталыстыбатын Бэрэссэдээтэлэ А.В.Тарасенко Аллайыаха улууһун Чокуурдаах сэлиэнньэтигэр көтөн тиийдэ. Андрей Владимировиһы кытта СӨ тыа хаһаайыстыбатын миниистирэ Александр Атласов, ОДьКХ миниистирэ Вячеслав Емельянов, тутуу миниистирэ Павел Кылатчанов, Арктика миниистирин бастакы солбуйааччы Сергей Неустроев, экэниэмикэ миниистирин солбуйааччы Иван Елисеев, экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы Яков Заровняев бааллар.
Бу күн 12 киһилээх бөлөх “Саханефтегазсбыт” АУо Чокуурдаахтааҕы ньиэп баазатыгар сылдьыахтара. Онтон “СӨ ОДьКХ” ГУП Чокуурдаахтааҕы канализационнай-ыраастыыр станцияны көрүөхтэрэ.
Салгыы Өлүөнэтээҕи өрүс пароходствотын суудуналара тохтуур-турар сирдэригэр, уот ыстаансыйатыгар, баһаарынай чааска сылдьан, үлэни-хамнаһы билсиэхтэрэ. Кинилэр үөрэх эбийиэктэригэр эмиэ таарыйыахтара. Сааҥсыйалар кэмнэригэр олохтоох оҥорон таһаарыыны улаатыннарыы соруга турарынан, “Аллайыаха” көс аҕа ууһун общинатын пенополистиролу оҥорор сыаҕын үлэтин эмиэ билсиэхтэрэ. Уонна, биллэн турар, тус хоту дойдуга, тутуу матырыйаалын тиэрдии уустук сиригэр ыытылла турар тутуулар хаамыыларын интэриэһиргииллэрэ чахчы. Ол курдук, Чокуурдаахха тутулла турар 275 миэстэлээх оскуола тутуутун хаамыытын, “Кытаанах тобоҕу харайар инсинераторнай установка” эбийиэгэр сылдьар эмиэ былааннаахтар.
Чокуурдаахха үлэни, олоҕу-дьаһаҕы билсэн баран, Аллайыаха улууһун социальнай-экэнэмиичэскэй сайдыытын боппуруостарыгар анаммыт сүбэ мунньах буолуоҕа.
Бэлэмнээтэ Женни Стрюкова
Хаартыска: интэриниэттэн