Андрей Тарасенко БКЭ тутарга оскуолалар бэлэмнэниилэрин сыаналаата
04.06.2021
Андрей Тарасенко эпидемиологическай быһыы-майгы кэмигэр БКЭ тутарга оскуолалар төһө бэлэмнэммиттэрин сыаналаата.
СӨ Бырабыыталыстыбатын бэрэссэдээтэлэ Андрей Тарасенко 2021 сылга өрөспүүбүлүкэ тэрилтэлэригэр түмүктүүр аттестацияны тэрийии боппуруоһунан сүбэ-мунньах ыытта. Тэрээһин чэрчитинэн, премьер Үөрэх уонна наука миниистирэ Михаил Сивцевы кытта бииргэ эксээмэннэр ыытыллар пууннарыттан биирдэстэригэр — 26 №-дээх орто оскуолаҕа сылдьан, эксээмэннэри ыытыыга оскуола төһө бэлэмнээҕин, онно санитарнай-гигиеническэй быраабыла төһө тутуһулларын бэрэбиэркэлээтилэр.
Роспотребнадзор рекомендациятыгар сөп түбэһиннэрэн, БКЭ ыытыллар пууннарыгар, эксээмэннэр күннэригэр, саҕаланыахтарын иннинэ уонна кэнниттэн, өрөспүүбүлүкэ үрдүнэн барыларыгар дезинфекциялыыр сириэстибэлэри туһанан генеральнай сууйу-сотуу ыытыллар, оскуолаҕа киирэр дьону барыларын кыраадыстарын мээрэйдииллэр, антисептиктаах дозатордар туруоруллаллар.
Маны таһынан, кылаастарга паарталар балтараалыы миэтэрэ тэйиччи туруоруллаллар, кылааска аҕыстыы киһи киирэр. Эксээмэни тутааччылар уонна выпускниктар мааскаларынан, бэрчээккилэринэн хааччыллыбыттар.
Бүгүн нуучча тылыгар түмүктүүр аттестация иккис күнэ, 26 №-дээх оскуолаҕа куорат араас оскуолаларыттан барыта 118 оҕо эксээмэн туттарар. Андрей Тарасенко оскуолаҕа Роспотребнадзор ирдэбиллэрэ тутуһуллубуттарын, эксээмэни туттарарга усулуобуйа тэриллибитин бэлиэтээтэ.
«Педагогтары кытары кэпсэттим, хайдах тэриллибитин барытын көрдүбүт. Бары усулуобуйа тэриллибит диэн ааҕабын. Оҕолор эксээмэннэрин туттараллара хаалла», — диир премьер.
Өрөспүүбүлүкэҕэ быйыл, 2021 сылга, эксээмэни ыытарга барыта 231 пуун үлэлиир. Итинтэн доруобуйаларынан хааччахтаах оҕолор эксээмэннэрин туттаралларыгар — 7 пуун тэриллибит. Дьокуускайга — 21 пуун.
БКЭ региональнай-информационнай тиһигэр 5 950 киһи холбоммут (былырыын 8 761 киһи этэ). Учууталлары уонна тэрийээччилэри таһынан, БКЭ ыытарга уопсастыбаннай кэтээн көрөөччүлэр бааллар.
Андрей Сорокин (СИА) хаартыскаҕа түһэриилэрэ
+1
+1
+1
+1
+1
+1
+1