Андрей Тарасенко: идэлээх сойуустары кытта куруук көрсүһүөхпүт
Саха сирин Бырабыыталыстыбатын Бэрэссэдээтэлин э.т. Андрей Тарасенко онлайн-көрүҥүнэн өрөспүүбүлүкэ идэлээх сойууһун актыыбын кытта көрсөн, социальнай уонна үлэҕэ сыһыаннаһыы боппуруостарыны көрдө rөрсүһүү “Дьоһун үлэни!” аан дойдутааҕы күҥҥэ сөп түбэстэ.
“Биһиги бас билии араас көрүҥнээх тэрилтэлэригэр үлэлээччилэри көмүскүүр туһугар күүспүтүн холбуохтаахпыт. Дойду уонна өрөспүүбүлүкэ салалтата биһиги иннибитигэр дьон үлэлээх буолуутун хааччыйар соругу туруораллар. Мантан эрэгийиэҥҥэ бүттүүнүгэр олох-дьаһах уонна экэниэмикэ туруга уонна сүүһүнэн тыһыынча киһи этэҥҥэ олоруута тутулуктаах “, — диэтэ Андрей Тарасенко.
Мунньах кыттыылаахтара үлэ ырыынагын сайдыытын боппуруостарын уонна үөрэхтээһин, доруобуйа харыстабылын, бырамыысылыннас уонна тырааныспар эйгэлэригэр үлэлээччилэргэ көмөлөһүү, үлэҕэ куттал суох буолуутун хааччыйыы, ыччаты производствоҕа кытыннарыы уонна ковид балаһыанньатын тула кэпсэттилэр.
Идэлээх сойуустар федерацияларын бэрэссэдээтэлэ Николай Дегятярев бэлиэтииринэн, үлэлэриттэн уурайар кутталлаах уонна үлэлэрин сүтэрбит дьоҥҥо көмөлөһөр сыалтан үлэни биэрээччилэр, идэлээх сойуустар уонна былаас бииргэ үлэлээһиннэрин күүһүрдүөхтэрэ.
Билигин өрөспүүбүлүкэҕэ 2024 сылга диэри Уһук Илин федеральнай уокуругар Саха сиригэр үлэтэ суох буолууну орто таһымҥа диэри аччатыыга тэрээһиннэр былааннарын барыла оҥоһулунна. Бу былаан үлэтэ суох буолууну аччатыыга уонна ситэриилээх былаас уорганнара быһаччы кыттыыларыгар төһүү буолуоҕа.
Мунньах түмүгүнэн премьер э.т. маннык көрсүһүүлэр куруук ыытыллан, үлэнэн хааччыйааччылар үлэ сокуоннаһын тутуһууларыгар суһал дьаһаллары ылынарга көмөлөһүөҕэ диэтэ.
Саха Өрөспүүбүлүкэтин Ил Дарханын уонна
Саха Өрөспүүбүлүкэтин Бырабыыталыстыбатын пресс-сулууспата.
Бэлэмнээтэ Женни Стрюкова
Хаартыска: тустаах саайтан