Андрей Тарасенко: Тиксии – Булуҥ оройуонун уонна Саха сирин Арктикатын бүттүүнүн тирэх киинэ
Саха сирин премьерин э.т. Андрей Тарасенко Булуҥ оройуонугар оробуочай сырыытын кэмигэр ыыппыт бырайыактыыр офис мунньаҕар Тиксии бөһүөлэгин 2025 сылга диэри кэлимсэ сайдыытын былаанын дьүүллэстилэр.
Бырабыыталыстыба чилиэннэрэ, муниципальнай уорганнар бэрэстэбиитэллэрэ, сайдыы институттара уонна Хотугу флот кыттыылаах мунньахха эрэгийиэн социальнай-экэнэмиичэскэй сайдыытын, туризм, каадырдары бэлэмнээһин, тырааныспар логистикатын уонна РФ Арктикатааҕы зонатыгар биисинэс боппуруостарын дьүүллэстилэр.
“Саха сирин баһылыга 2035 сылга диэри өрөспүүбүлүкэ Арктикатааҕы умнаһын олоҕун-дьаһаҕын уонна экэниэмикэтин сайдыытын стратегиятын бигэргэппитэ. Бу стратегия – Артикаҕа дьон олоҕун таһымын үрдэтиигэ, нэһилиэнньэ көһүүтүн тохтотууга уонна манна олорорго, үлэлииргэ, биисинэһи ыытыыга табыгастаах сири-уоту тэрийиигэ сүрүн докумуоммут”, — диэн Андрей Тарасенко бэлиэтээтэ.
Өрөспүүбүлүкэ премьерин э.т. этэринэн, өрүстэргэ пуорт пууннарын сайыннарыы уонна дириҥ ууга турар пуорду тутуу тутаах соругунан буолуохтаахтар. Балар таһаҕаһы тиэйиини-таһыыны, хомунаалынай, тырааныспар уонна уот инфраструктуратыгар, аһынан-үөлүнэн хааччыйыыны кэҥэтиигэ көмөлөһүөхтэрэ.
“Дириҥ ууга турар муора бырайыагын олоххо киллэрдэхпитинэ, Тиксии Хотугу муора суолун нөҥүө өрөспүүбүлүкэни бүттүүнүн хааччыйар киининэн уонна Саха Өрөспүүбүлүкэтин Арктика сирин-уотун сайыннарыыга төһүү буолуоҕа. Инфраструктура эбийиэктэрэ кыаҕырдахтарына, биһиги социальнай эбийиэктэри эмиэ хааччыйар кыахтаныахпыт: оскуолалары, балыыһалары, дьыссааттары, култуура уонна спорт кииннэрин. Дьон Арктикаҕа үлэлии эрэ буолбакка, олохсуйа кэлэрин туһугар”, — диэн бэлиэтээтэ Андрей Тарасенко.
Бырайыактар араас салааларга бааллар: тырааныспарка, доруобуйа харыстабылыгар, үөрэхтээһиҥҥэ, төрүт үгэстэргэ уо.д.а. Бырайыактыыр офис балары Булуҥ оройуонугар сайыннарыыга чопчу көрүүлээх буолуохтаах.
Саха Өрөспүүбүлүкэтин Ил Дарханын уонна бырабыыталыстыбатын пресс-сулууспата.
Женни Стрюкова бэлэмнээтэ.
«Саха сирэ» хаһыат, edersaas.ru