Андрей Сивцев: «Култуура кииннэрин сайыннарыы туһунан этиини сэргээтим»
Ил Дархан Айсен Николаев Анал этиитин хоту-соҕуруу, илин-арҕаа улуустарга интэриэһиргээн иһиттилэр.
edersaas.ru
Ньурба улууһун Чуукаар нэһилиэгин Егор Поликарпов аатынан «Эйгэ» норуот айымньытын уонна успуорт киинин уус-уран салайааччыта Андрей Сивцев санаатын бу курдук үллэһиннэ:
— Саҥа дьылы көрсөөрү сылдьан, Ил Дархан сылы түмүктүүр Анал этиилээҕэ үгэс быһыытынан ыытыллар буолбута олус кэтэһиилээх. Ордук быйылгы уустук дьылга сыл түмүгүн туһунан Аҕа баһылык анаарыыта олус уратытык иһилиннэ. Бу, арааһа, сыстыганнаах дьаҥ кэмигэр дьиэҕэ олоруу, дьону кытта чугастык утары олорон кэпсэппэтэх өр буолан дуу, санаабар, биир бэйэм олус үөрэ уонна долгуйа иһиттим. Ил Дархан хас биирдии этиниитин кытта тэҥҥэ олохпут балысханнык сайдыытыгар туһааннаах холобурдарын сөпсөһө олордум.
Ол курдук, былырыын баччаларга IT-технологияны эндэппэккэ баһылаан, нэһилиэк култуурунай киинин тэрээһиннэригэр өрөспүүбүлүкэ бары улуустарын хабан үлэлиэхпит диэн өйгө да суоҕа. «Куһаҕан да үчүгэйдээх…» диэбиккэ диэри, сыстыганнаах дьаҥынан сибээстээн, дьон дьиэҕэ олорор кэмигэр биир да күн үлэбитин тохтоппокко, цифровой технологияны баһылаан, куйаар ситиминэн тэрээһин арааһын ыытар буоллубут. Онон Айсен Николаев «бу салаа олохпутугар бигэтик өтөн киирдэ» диэн этиитин кытта толору сөпсөһөбүн. Ардыгар «хайдах үлэ бу көдьүүстээх көрүҥүн урут туһаммат этибитий?» дии саныыгын. Бу мантан, IT-технологияттан саҕыллан тахсар Ил Дархан холобурдаабыт — «креативнай» дэнэр экэниэмикэтэ, куйаар ситиминэн үөрэх, тулалыыр эйгэни харыстааһын, туризм, онтон да атын хайысхалар сайдыылара.
Маны сэргэ, сайдыы биир улахан олугунан култуура буоларын, култуура кииннэрэ сайдыыларыгар туһаайыытын бэркэ сэргээн иһиттим. Тыа сирин бары кулууптара аныгылыы тэтиминэн цифровой технологияны баһылаан үлэлээтэхпитинэ, бар дьоммутун сырдыкка сирдиэхпит диэн эрэнэбин.
Елена ПОТОЦКАЯ, «Саха сирэ» хаһыат, edersaas.ru