Бэлиитикэ Маны аах

Андрей Находкин: “Хаарбах дьиэттэн дьону көһөрүү бырагырааматын үһүс түһүмэҕэ салгыы үлэлиир буолла”

Бэҕэһээ, ахсынньы 23 күнүгэр,  РФ Бэрэсидьиэнэ Владимир Путин сыллата ыытыллар улахан пресс-кэмпириэнсийэтэ буолан ааста.

Андрей Находкин, Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ: 

—Дойдубут Бэрэсидьиэнэ Владимир Путин Арассыыйа ыытар бэлиитикэтин суолуттан туораабатын өссө төгүл бигэргэттэ.  Социальнай хайысхаҕа үбүлээһин аччаабыт курдук  диэн үһү-таамах сурахтары бэйэтин хоруйунан киэр илгэн кэбистэ. Үбүлээһин аччаабатын ааһан, сыыйа эбиллэн иһиэҕин эттэ. Саамай билиҥҥи кэмҥэ сытыытык турар боппуруоһу — хаарбах дьиэттэн дьону көһөрүү бырагырааматын үһүс түһүмэх быһыытынан уһатыаҕын, салгыы үлэлэтиэҕин туһунан эппитин эрэгийиэннэр бары да үөрэ истибит буолуохтаахтар. Тас дойдулары кытта сыһыан уларыйбатын, барыларыгар эйэ-дэмнээхтик, биир тэҥник сыһыан баарын өссө төгүл лаппыйан эттэ, онон сиэттэрэн, сэрии эҥин буолуо диэн күөртээһин олоҕо суоҕун итэҕэйдим.

Араас итэҕэллээх элбэх омук иллээхтик-эйэлээхтик олороругар туһуламмыт судаарыстыбаннай бэлиитикэ инникитин уларыйыа суохтааҕын Владимир Путин тоһоҕолоон эттэ. Төрөөбүт тыл, култуура, норуот уус-уран маастарыстыбата хатыламматын, ол иһин харыстаныах, өйөнүллүөх тустаах диэн эттэ.

 

 

 

0
0
Telegram @edersaas20