Андрей Кривошапкин: “Арктика уонна хоту дойду – биһиги уопсай баайбыт”
Аҕыйах хонуктааҕыта Айсен Николаев Саха парламеныгар урут саамай эдэр дьокутаат буолан талыллыбыт сириттэн — Өлөөн национальнай эбэҥки оройуонугар оробуочай сырыытын кэмигэр 2035 сылга диэри эрэгийиэн Арктика түөлбэтин социальнай-экэнэмиичэскэй сайдыытын туһунан ыйаахха илии баттаабыта.
Бу докумуон Арктика бары олохтоохторун олохторун-дьаһахтарын, үлэлэрин-хамнастарны тупсарыыга дьиҥнээх хардыынан буолуохтаах. Билигин Арктика түөлбэтигэр 13 оройуон киирэр, манна 70 тыһыынча киһи олорор. Бу ыйаах туһунан Саха сирин норуодунай суруйааччыта, СӨ Хоту дойду аҕыйах ахсааннаах төрүт норуоттарын ассоциациятын бэрэсидьиэнэ Андрей Кривошапкин санаатын үллэһиннэ:
— Кэм-кэрдии ирдэбилигэр олоҕуран, бу ыйаах историческай докумуон буолар. Докумуон ордук дьоҕуһун бэлиэтиэм этэ, ааҕыллара олус чэпчэки. Бу докумуоҥҥа Арктика салгыы, Саха Өрөспүүбүлүкэтин киэнэ даҕаны сайдар суола ырылыччы көстөр.
Итинэн сибээстээн, нуучча улуу бэйиэтэ А.С.Пушкин: “Кылгатан этии – талаан балта” диэн этиитин санаан кэллим.
Арктика Стратегиятын толорууну сүрүннээччинэн СӨ Арктика уонна Хоту дойду норуоттарын дьыалаларыгар министиэристибэтэ анаммыта олус сөптөөх. Улахан уонна үрдүк эппиэтинэстээх үлэ күүтэр, маныаха үгүс дьон кыттара уонна үп-харчы ресурсата ирдэнэр.
Биһиги, Уһук Хоту дойду норуоттара, Арктика уонна өрөспүүбүлүкэ олохтоохторун устуоруйаҕа киирэр улахан эппиэтинэстэрин өйдүүбүт. Докумуон Саха сирин олохтоохторун бары өрүттэрин таарыйар, о.и. Хоту дойду төрүт норуоттарын. Нэһилиэнньэ бүттүүнэ, хотулары киллэрэн туран, ыкса иллээхтик олоро үөрүйэхтэр, кыра да, улахан да кыһалҕаларга бэйэ-бэйэлэрин өйөһөн. Маныаха бииргэ ыаллаһан олоруу ис хоһооно сытар: олох бары кыһалҕатын тэҥҥэ үллэстэн, олох устун сарын сарыҥҥа өйөнөн барыы. Бу өттүгэр өрөспүүбүлүкэбит баай уопуттаах.
Арктика уонна Хоту дойду – биһиги уопсай баайбыт. Бу, туох да мэлдьэҕэ суох, биһиги киэн туттуубут уонна инники сайдар тосхолбут. Мин өрүү уонна үгүстүк киэн тутта этээччибин: “Арассыыйа Федерациятын састаабыгар киирэр Саха Өрөспүүбүлүкэтин курдук күлүмүрдүү сыдьаайар дьикти дойду аан дойдуга ханна да суох!”.
Улусмедиа саайтан.
Бэлэмнээтэ Женни СТРЮКОВА.
Хаартыска — тустаах саайтан