Россия Бэрэсидьиэнигэр Саха Өрөспүүбүлүкэтин Бастайааннай бэрэстэбиитэлин э.т. Андрей Федотов бүгүн суруналыыстарга Бэрэстэбиитэлистибэ үлэтэ кэҥэтиллэрин, дириҥэтиллэрин туһунан кэпсээтэ.
edersaas.ru
— Ил Дархан э.т. Айсен Николаев Бэрэстэбиитэлистибэ иннигэр дойду киин куоратыгар, Москваҕа, өрөспүүбүлүкэ сайдыытын боппуруостарын быһаарарга федеральнай былаас уорганнарын кытары үлэ көдьүүһүн үрдэтэр, Саха Өрөспүүбүлүкэтин Бырабыыталыстыбатын үлэтин салгыыр соругу туруорда. Онон, үлэбитин-хамнаспытын кэҥэтэбит, — диэтэ.
Бэрэстэбиитэлистибэ, күн бүгүҥҥү туругунан, 42 эрэгийиэни кытары сөбүлэһиилэри уонна дуогабардары түһэрсибит. Кэлэр өттүгэр уопут атастаһарга сөптөөх бастыҥ көрдөрүүлээх эрэгийиэннэри итиэннэ бөдөҥ собуоттардаах өрөспүүбүлүкэлэри кытары үлэтин кэҥэтэргэ быһаарбыт. Ол курдук, агропромышленнай комплекска бастаан иһэр технологиялаах Краснодарскай кыраайы, сөмөлүөттэри, бөртөлүөттэри оҥорор Татарстаны, Башкортостаны, Арктикаҕа ледоколлары оҥорор собуоттаах Санкт-Петербуру, оҕо сайыҥҥы сынньалаҥын тэрийиигэ Крымы уо.д.а. кытары дуогабардар оҥоһуллуохтаахтар.
Ааспыт өттүгэр Бэрэстэбиитэлистибэ иһинэн федеральнай министиэристибэлэри, биэдэмистибэлэри кытары үлэлииргэ уон штат көрүллэр буоллаҕына, билигин ону сарбыйан, сааһылаан, биир управление тэриллэн эрэр эбит. Бу управление федеральнай былаас уорганнарын кытары үбү-харчыны тардыыга, инновацияларга итиэннэ өрөспүүбүлүкэ сиригэр-уотугар үлэлиир корпорациялары кытары бииргэ үлэлиэхтээх.
Раиса Сибирякова, “Саха сирэ” хаһыат, edersaas.ru