Суолталаах Экэниэмикэ

Андрей Данилов: “Тыа сирин олохтоохторугар бэртээхэй бырайыак олоххо киирэр буолбут”

Соторутааҕыта Ил Дархан Айсен Николаев кэтэх дьиэни туттарга аналлаах чэпчэтиилээх кирэдьиити көрөргө пилотнай бырайыагы саҕалыырга сорудахтаабыта.  

«Тыа сиригэр дьиэни бэдэрээччитэ суох, бэйэ кыаҕынан тутуу тарҕаммыт үгэс, онон бу бырагыраама биһиги өрөспүүбүлүкэбитигэр бэрт туһалаах буолуон сөп. Муниципальнай тэриллиилэри кытта бииргэ үлэлэһэн, бырайыагы олоххо киллэрэн дьоҥҥо көмө буолуох тустаахпыт. Бырайыак олоххо киирдэҕинэ, тыа сиригэр олорор дьон 6 мөл. солк. тиийэр үбү 9 %-наах  кирэдьиит быһыытынан ылыахтарын сөп», — диэн Айсен Николаев быһаарбыта. Бу дьаһалы тутааччылар уонна, саамай сүрүнэ, тыа сирин олохтоохторо сэргии иһиттилэр.

РФ бочуоттаах уонна Саха сирин үтүөлээх  тутааччыта, тутуу  уопуттаах  исписэлииһэ уонна “Туймаада Строй” ХЭУо дириэктэрэ Андрей Данилов: “Бу Арассыыйа уонна Украина сыһыаннарыттан сылтаан арҕаа дойдулар куомуннаһан араас хабааннаах экэнэмиичэскэй сааҥсыйаларын соҥнуур кэмнэригэр тыа сиригэр кэтэх дьиэни туттааччыларга  аналлаах чэпчэтиилээх кирэдьииттээһин пилотнай бырайыагын олоххо киллэрэр туһунан сорудахтаабытын биир бэйэм уонна тыа сиригэр олорор билэр дьонум бары биһирии иһиттибит, үөрдүбүт.

Ити араас хабааннаах сааҥсыйалартан сылтаан тутуу матырыйаалын сыаната биллэрдик үрдээтэ, аны ону ыраах сытар улуустарга тиэрдии ороскуота лаппа ыараата. Ааспыт икки сылга Бырабыыталыстыбабыт уонна Ил Түмэн көмөлөрүнэн  дьиэни туттуу элбээтэ. Онуох эбии коронавирус дайар дьаҥыттан сылтаан, ааспыт икки сыл иһигэр  Дьокуускайга уонна улуустар кииннэригэр хаһааҥҥытааҕар да элбэх чааһынай дьиэ тутуллубутун бары илэ харахпытынан көрөн толору итэҕэйдибит. Билигин да туттуон баҕалаахтар аҕыйаҕа суохтар эрээри, эрдэ эппитим курдук,  мэһэйдэр, кэккэ ыарахаттар баалларыттан сылтаан,  туттар кыахтара тиийбэт. Уһук Илиҥҥи чэпчэтиилээх ипэтиэкэҕэ хапсар эдэр дьон чааһынай дьиэни хамаҕатык тутуннулар. Оттон итиннэ хапсыбат дьон  хаалан хааллылар. Онон орто саастаах дьон тыа сиригэр дьиэни тутталларыгар сөптөөх кирэдьиити биэрэр  бырайыак адьас кэмигэр саҕаланар буолбут. Мин санаабар, чэпчэтиилээх ипэтиэкэ кирэдьиитин биэриигэ сааһынан хааччахтааһын киллэриллибэтэ буоллар,  кэтэх дьиэни туттуон баҕарааччыларга уонна хамнас өттүнэн кыһарыйтарбыт дьоҥҥо  көдьүүстээх буолара саарбаҕа суох”, — диэн санаатын үллэһиннэ.

 

Хаартыска —Якутия дейли.

 

0
0
Telegram @edersaas20