Бу күннэргэ Сунтаар улууһугар, эмиэ буоларын курдук, сонун тэрээһиннэр ыытылыннылар. Ол курдук, билиҥҥи кэм саха худуоһунньуктарыттан биир бастыҥнарынан ааттанар, Сунтаартан төрүттээх Андрей Чикачев быыстапката ахсынньы 5 күнүгэр арылынна.
edersaas.ru
Андрей Чикачев быыстапкалара Арассыыйаҕа, ону ааһан омук дойдуларыгар ситиһиилээхтик туруоруллубуттара. Кини хартыыналарыгар тыа сирин олоҕо, дойдубут кэрэ айылҕата көстөр. Сунтаардар айылҕаттан айдарыылаах худуоһунньуктарын талааныгар сүгүрүйэн, улуус баһылыга Анатолий Григорьев «Сунтаар улууһун Бочуоттаах олохтооҕо» диэн бэлиэни туттарда. Бу туһунан баһылык көмөлөһөөччүтэ Тимур Иванов «Эдэр саас» сайтка иһитиннэрдэ.
Улууска ыытыллыбыт иккис улахан тэрээһининэн уопсастыбаннай оҕо түмсүүлэрин форума буолла. Ол чэрчитинэн баһылык Анатолий Григорьев оскуола оҕолорун кытта көрүстэ, кинилэр төрөөбүт-үөскээбит улуустарын сайдыытыгар көрүүлэрин, санааларын иһиттэ уонна инники көлүөнэҕэ олохторугар, үөрэхтэригэр ситиһиини баҕаран туран, алгыс тылынан эҕэрдэлээтэ.
Форум алта хайысханан үлэлээн, бастыҥ үлэлээх түмсүүлэр харчынан бириэмийэлэри туттулар. Ол курдук, Тойбохой орто оскуолатын иһинэн үлэлиир «Новое поколение» хамсааһыҥҥа 10000 солк., Түбэйдээҕи «Тирэҕэ кэскилэ» түмсүүгэ 8000 солк., Сунтаар 1-кы нүөмэрдээх «Эрэл» түмсүүтүгэр 5000 солк. туттарылынна.
Анивера АКИМОВА, edersaas.ru