Андрей Чибис: «Хаарбах дьиэттэн дьону көһөрүү 2019 с. үбүлэниэҕэ»

Арассыыйа тутууга уонна олох-дьаһах, хомунаалынай хаһаайыстыбатын миниистирин солбуйааччы Андрей Чибис балаҕан ыйын 4 күнүгэр Дьокуускайга кэлэ сылдьан тутуу уонна ОДЬКХ эйгэтигэр саҥа сүүрээннэри киллэрии туһунан киэҥ далааһыннаах кэпсэтии ыытта.

edersaas.ru

Өрөспүүбүлүкэ ОДЬКХ уонна энергетика миниистирэ Данил Саввинов иһитиннэрбитинэн, 1255 хочуолунай баарыттан аҥаара чоҕунан, чиэппэрэ гааһынан, атыттара ньиэбинэн, гаас конденсатынан оттуллаллар.

«Хомунаалынай инфраструктураны саҥардарга бүтэһик биэс сыл иһигэр 27 млрд. солк., онтон 6,2 млрд. солк. бүддьүөт харчытын уктубут. 379 эбийиэги туттубут, сорохторун саҥардан биэрдибит, 1220 км. уһуннаах инженернай ситимнэри тартыбыт», — диэн билиһиннэрдэ кини.

Бүддьүөт харчыта кырыымчык буолан, чааһынай инвестицияны киллэрэргэ үлэ барар. Чурапчыга сууккаҕа 500м3 кирдээх ууну ыраастыыр ыстаансыйа тутуллан үлэҕэ киирдэ.

«Эһиил хомунаалынай хаһаайыстыба 13 эбийиэгэ саҥардыллыаҕа, онно 600 мөл. солк. көрүлүннэ. 19 энергосервиснай дуогабарга 276 мөл. солк. угулунна. Хочуолунайдары оттугу харыстаан туттар технологияҕа көһөрүү түмүгэр 1 млрд. солк. кэмчилиир кыахтаныахпыт”, — диэн быһааран эттэ миниистир Данил Саввинов.

Өрөспүүбүлүкэҕэ 2009с. эниэргийэни харыстаан туттуу бэлиитикэтэ ыытыллар. Ол курдук 431 эбийиэк итинник эрэсиимҥэ көстө.

Дойду бэрисидьиэнин ыйааҕынан «Ыраас уу» федеральнай бырайыак олоххо киириэхтээх.

«Күн бүгүн нэһилиэнньэ ыраас ууннан хааччыллыыта мөлтөх. Тыа сиригэр тустаах водозабор, ууну ыраастыыр ыстаансыйа суох, дьон күөл мууһун хаһаанан, ону ыраастаабакка эрэ иһэн олороллор. Дьокуускай куоракка саҥа водозабор үлэҕэ киирэн, ууннан хааччыллыы биллэ тупсуо», — диэтэ кини. Онон, «Ыраас уу» бырайыагы куоракка эрэ буолбакка, улуустарга, ыраах сытар кытыы нэһилиэктэргэ эмиэ тириэрдэр наадалааҕын ыйда.

Онон, хомунаалынай хаһаайыстыба эйгэтигэр оттугу харыстаан туттар саҥа технологиялаах оборудованиеҕа көһүү аныгы кэм ирдэбилэ буолара этилиннэ. Маны таһынан, Сахабыт сирин олохтоохторун барыларын ыраас ууннан хааччыйыы наадалааҕа бэлиэтэннэ.

Арассыыйа тутууга уонна олох-дьаһах, хомунаалынай хаһаайыстыбатын миниистирин солбуйааччы Андрей Чибис национальнай бырайыактары олоххо киллэрэр наадалааҕын эттэ.

«Нэһилиэнньэни хаачыстыбалаах дьиэннэн хааччыйыахха наада, дьон олороругар бары өттүнэн табыгастаах усулуобуйа тэриллиэхтээх. Саха сиригэр эргэрбит саахалланар туруктаах хаарбах дьиэ олус элбэх эбит, кинилэри саҥа дьиэҕэ көһөрүү сүрүн боппуруос. 2019 с. хаарбах дьиэттэн дьону көһөрүү бырайыага үбүлэнэн, өрөспүүбүлүкэ эмиэ тустаах үбү-харчыны ылан, баар кыһалҕа быһаарыллан иһиэ.

Ону таһынан, «Өйдөөх куорат» бырайыагынан куораттар хаһаайыстыбаларын цифровизациялыыр наадалаах. Бу хайысханан үлэлиир субъектар табыгастаах куорат эйгэтин оҥорорго элбэх харчыны ылыахтара», — диэтэ федеральнай миниистир солбуйааччыта.

Кини Дьокуускайга бу күннэргэ саҥа аһыллыахтаах Учуутал бульварын көрөн үрдүктүк сыаналаата уонна Уһук Илин эрэгийиэҥҥэ биир бастыҥ оҥоһуулаах сквер буоларын эттэ.

Марианна Тыртыкова, «Саха сирэ», edersaas.ru