Уопсастыба

Андрей Борисов бэлиитикэнэн күүскэ дьарыктанар санаалааҕын иһитиннэрдэ

Андрей Борисов, Саха Өрөспүүбүлүкэтин Судаарыстыбаннай сүбэһитэ, Саха Өрөспүүбүлүкэтин Духуобунаһын академиятын бэрэсидьиэнэ, айар уонна судаарыстыбаннай, уопсастыбаннай   үлэтигэр аналлаах 3 томнаах кинигэтэ бэчээккэ тахсыбытын киэҥ эйгэҕэ билиһиннэрдэ.

Бу тэрээһин Өрөспүүбүлүкэ күнүгэр ыытыллыбытынан ураты бэлиэ буолла. Өрөспүүбүлүкэтээҕи Медиакииҥҥэ ыытыллыбыт пресс-конференцияҕа Андрей Саввиһы кытта биир идэлээхтэрэ, соратниктара – биллиилээх артыыс Ефим Степанов, режиссер Руслан Тараховскай, театральнай кириитик Валентина Чусовская, “Саха сирин суруйааччылара” Ассоциация  бэрэссэдээтэлэ, суруйааччы, суруналыыс  Олег Сидоров, о.д.а. кыттыыны ыллылар, саҥа кинигэ уонна култуура боппуруостарыгар санааларын үллэһиннилэр.

Андрей Саввич бу үс томнаах кинигэ ис хоһоонун кылгастык билиһиннэрдэ уонна Саха тыйаатырын суолтатын, култуура историятын, Саха киинэтин инникитин туһунан, о.д.а. суруналыыстар ыйытыыларыгар хоруйдаата.

 Кинигэ, саха култууратын “үрүҥ көмүс үйэтэ” бара турарын кэрэһилээн, таһа сахаҕа чугас үрүҥ көмүһүнэн дуйдаммыта эмиэ бэлиэтэннэ.

Биллэрин курдук, соторутааҕыта Андрей Борисов, праймериз түмүгүнэн Бүлүү улууһугар биир мандааттаах уокурукка кыайан, Ил Түмэҥҥэ дьокутаакка киирсиигэ хандьыдаатынан буолар. Бу тиэмэ таарыйыллыбытыгар кини: “Бэлиитикэнэн олохтоохтук дьарыктанар санаалаахпын”, — диэтэ.

 

Татьяна МАРКОВА.

2
0
Telegram @edersaas20

Добавить комментарий