Тохсунньу 11 күнүттэн Лида куоракка (Гродно уобалаһа) Белоруссия спортивнай тустууга чөмпүйэнээтэ ыытылла турар. Бүгүҥҥүттэн “Олимпия” Спорт дыбарыаһын көбүөрүгэр көҥүл тустууга хапсыһыылар саҕаланыахтара. Бу түһүлгэ түмүгүнэн муус устар ыйга Бухареска (Румыния) ыытыллар Европа чөмпүйэнээтигэр итиэннэ II Европа оонньууларыгар кыттар хамаанда сүүмэрдэниэҕинэн, дойду күүстээх бөҕөстөрө бары кытталлар.
Иһитиннэриллибитин курдук, Лида көбүөрүгэр саха тустууга оскуолатын үс иитиллээччитэ – Европа түөрт төгүллээх призера Владислав Андреев, Иван Ярыгин Гран-при турнирын чөмпүйүөнэ Ньургун Скрябин, Александр Медведь бирииһигэр норуоттар икки ардыларынааҕы турнир кыайыылааҕа Андрей Бекренев — тустуоҕа.
Быйылгы чөмпүйэнээккэ Владислав Андреев 57 киилэҕэ диэри ыйааһыҥҥа, өрүү буоларыныы, кыһыл көмүс мэтээл иһин киирсиэҕэ. Манна киниэхэ сүрүн утарылаһааччынан Дмитрий Коркин кэриэһигэр былырыыҥҥы турнир призера, Бурятия баһылыгын түһүлгэтин кыайыылааҕа Димчик Ринчинов буолара сабаҕаланар.
Быйылгы чөмпүйэнээккэ Андрей Бекренев күүһүн 61 киилэлээхтэргэ холонуо диэн буолар. Бу икки ыйааһыҥҥа тоҕустуу бөҕөс тустар.
Оттон 65 киилэҕэ диэри ыйааһыҥҥа уон сэттэ тустуук күрэс былдьаһар. Манна Ньургун Скрябин лидер буоларын бигэргэтиэн наада. Ол эрээри Рио-де-Жанейротааҕы Олимпийскай оонньуулар кыттыылаахтара Асадулла Лачинов итиэннэ Европа үрүҥ көмүс призера Георгий Колиев эмиэ баардарынан-суохтарынан кыайыы эрэ туһугар киирсэр санаалаахтара сэрэйиллэр.
Онон тустууну сэҥээрээччилэр Лида көбүөрүттэн сонуннары тэһийбэккэ-тулуйбакка күүтэллэр.
Роман Попов
Хаартыска Интэриниэттэн ылылынна