Лида куоракка буола турар спортивнай тустууга Белоруссия чөмпүйэнээтигэр саха тустууга оскуолатын үс иитиллээччитэ бүгүн кыһыл көмүс мэтээл иһин киирсиэҕэ.
57 киилэлээхтэргэ Европа түөрт төгүллээх призера Владислав Андреев үс утарылаһааччытын хотон баран, күүтүллүбүтүн курдук, финалга бу ыйааһыҥҥа сүрүн күрэстэһээччитин – Дмитрий Коркин кэриэһигэр норуоттар икки ардыларынааҕы турнир призера, Бурятия баһылыгын бирииһигэр күрэхтэһии кыайыылааҕа Димчик Ринчиновы кытта күөн көрсүөҕэ.
Александр Медведь аатынан норуоттар икки ардыларынааҕы турнир кыайыылааҕа Андрей Бекренев 61 киилэҕэ диэри ыйааһыҥҥа эмиэ үс утарылаһааччытын кыайан, финалга таҕыста. Кыайыылааҕы быһаарар түмүк хапсыһыыга кинини утары Евгений Ребиков тахсыаҕа.
Саха тустууга оскуолатын өссө биир иитиллээччитэ – Иван Ярыгин Гран-при итиэннэ Тахти Кубогын чөмпүйүөнэ Ньургун Скрябин 65 киилэлээхтэргэ эмиэ кыһыл көмүс мэтээл иһин киирсиэҕэ. Финалга тахсар иһин хапсыһыыга Ньургун биир күүстээх утарылаһааччытын — Рио-де-Жанейротааҕы Олимпийскай оонньуулар кыттыылаахтарын Асадулла Лачиновы 10:4 ахсаанынан хотто. Бүгүн саха бөҕөһө Европа үрүҥ көмүс призера Георгий Колиевы кытта тустуоҕа. Онно олимпийскай ыйааһыҥҥа бүгүҥҥү күҥҥэ хайалара лидер буолара биллиэҕэ.
Бу түһүлгэ түмүгүнэн муус устар ыйга Бухареска ыытыллар Европа чөмпүйэнээтигэр итиэннэ бэс ыйыгар Минскэйгэ буолар II Европа оонньууларыгар кыттар хамаанда сүүмэрдэниэҕэ.
Роман Попов, edersaas.ru
Хаартыска Интэриниэттэн ылылынна.