Анатолий Бурнашев “Подмосковные вечера” туһунан батсаап сураҕын бигэргэттэ
Бу күннэргэ, биллиилээх ырыаһыппыт Анатолий Бурнашев, Москва биир элитнэй рестораныгар «Подмосковные вечера» ырыаны ыллаан соһуппутун туһунан сурах батсаабынан тарҕаммыта. Анатолийтан бэйэтиттэн ис дьиҥин билэргэ быһаарынныбыт.
Ыллыы кэлбитигэр, “топпут завсегдатайдар” бастаан сэнии көрбүттэрин, онтон уолбут “Подмосковные вечера” ырыаны ыллаан киирэн барбытыгар, куолаһын истээт, тута ах барбыттарын, күлэн ымайа олорбуттара ханна да суох буолан хаалбытын, үгүстэр, олус сэдэх кэрэ куоластан, үчүгэй толорууттан уйадыйан, үөрэн, долгуйан, харахтарыттан уу-хаар баспытын бэйэлэрэ да өйдөөбөккө хаалбыттарын, ытыс тыаһа өрө хабылла түспүтүн, «Браво!», “Бис!” дииллэриттэн соло булбатахтарын туһунан этиллэр.
edersaas.ru
Итинник буолуон сөп. Саарбахтаабаппын. Тоҕо диэтэххэ, Анатолий Бурнашев курдук талааннаах ырыаһыт, сөбүлэһиҥ, аҕыйах.
Итинник санаан туран, тугун-ханныгын өссө бэйэтиттэн истэн чуолкайдаһаары, Анатолий Аркадьевичка төлөпүөннүү сырыттым. Онуоха кини:
— Итинник түгэн элбэх этэ. Москвичтар, атын да омук дьоно, ордук, муусуката суох ыллаатаххына сэҥээрэн, иһиҋэн, иһигэр киирэн истэр түгэннэрэ баар буолааччылар. Ити батсаапка кэпсэтэллэрэ биир эрэ түгэн буоллаҕа дии… Өскөтүн дьон, бэйэтин үрдүктүк туттан, аанньа ахтыбатаҕына, эн кини сатаабатын оҥоруоххун наада. Уонна ону үрдүк таһымҥа оҥоруохтааххын. Кини уунан тииҋбэт сириттэн ылыаххын наада. Биһиги аҋылҕаттан тэҋбэтэх уратыбыт онно сытар. Ис дьиҥнэрин, аҋылҕаларын таарыттардахтарына, ытыахтара эрэ дуо, ытыы-ытыы батыһа да сылдьыахтарын сөп буоллаҕа… Сүтэрбиттэрэ элбэх буоллаҕа дии. Аҋылҕаны хаһан да, ханнык да түгэҥҥэ кыаҋан албыннаабаккын. Мин “Подмосковные вечера” ырыаны ыллааммын, 1995 сыллаахха Москва куоракка Бүтүн Арассыыйатааҕы «Знаешь ли ты Францию…» диэн оскуола оҕолоругар ыытыллыбыт ырыа куонкуруһугар бастакы миэстэни ылбытым уонна Францияҕа баран үөрэнэн кэлбитим. Оттон, сорох дьон ардыгар ону-маны күүркэтэр үгэстээх, бэйэҕит да көрө-истэ сылдьаргыт буолуо… Дьиҥэр, бу күннээҕи олох олоруу буоллаҕа дии, — диэн, холкутук хоруйдаата ырыаһыт.
“Подмосковные вечера” — киһини барытын долгутар ырыа, ордук биһиги көлүөнэни — сэбиэскэй кэмҥэ улааппыт дьону. Онон, Анатолий Бурнашевка махтал! Дьиҥнээх, Айылҕа биэрбит талаана, кэрэ түгэн хайдахтаах да таас сүрэҕи уулларар, ыраах кистэммит киһилии сиэрин, кутун-сүрүн уһугуннарар буоллаҕа! Дьэ, олоххо итинник умнуллубат түгэннэр бааллар.
Татьяна МАРКОВА, «Саха сирэ» хаһыат, edersaas.ru