Анал этии: Ил Дархан сайдыы өттүгэр чопчу көрүүлээх

Бөлөххө киир:

Саха сирин Ил Дархана Айсен Николаев Анал этиитин өрөспүүбүлүкэ Судаарыстыбаннай Мунньаҕар оҥордо. Култуура сайдыытыгар, чуолаан улуустарга этнокултуурунай кииннэри тутуу туһунан эттэ. Тааттатааҕы норуот айымньытын дьиэтин салайааччыта, улуус дьокутаата Гаврил Вырдылин Анал этии кэнниттэн санаатын үллэһиннэ:

— Ил Дархан Айсен Сергеевич  Николаев сайдыы өттүгэр чопчу көрүүлээх, дириҥ билиилээх, хамсатыылаах салайааччы. Сайдыыны кытары култуура эйгэтэ ыкса ситимнээх. Бу балысханнык аан дойду хардыылыыр кэмигэр Саха Өрөспүүбүлүкэтигэр  олорор омуктар, дьон-сэргэ төрүт култууратын тута сылдьарыгар улахан уларыйыылар буолуохтарын сөп. Ил Дархан тылы харыстыырга анал хамыыһыйа тэрийбитэ олус үчүгэй. Аны төрүт култуураны тарҕатар дьону, ол иһигэр Б.Ф.Неустроев-Мандар Уус 75 сааһын далааһыннаахтык бэлиэтиири бэйэтинэн өйөөтө. Быйыл сахалар чыпчаал тутуубут Моҕол ураһа түөрт үйэ буолан баран илиинэн тигиллэн Тааттаҕа дьэндэйдэ. Аны кэргэнинээн, Людмила Валерьевналыын «Сохраним памятники » өрөспүүбүлүкэтээҕи аахсыйаны көҕүлээннэр Чөркөөх мусуойун эбийиэктэрэ сөргүтүллэн эрэллэр. Саха киинэтэ чыпчаалга тахсан эрэриттэн бука бары үөрэбит. Киинэ устуута анал бырагырааманан өйөнөрө наһаа үчүгэй. Хамсык дьаҥын кэмигэр  култуура эйгэтэ улаханнык оҕустардыбыт. Куһаҕан үчүгэйдээх дииллэринии, култуура эйгэтин үлэһиттэригэр цифровизация күүскэ киирдэ. Билигин сааһыттан тутулуга суох, үгүспүт  аныгы технологияны баһылаатыбыт, элбэх куурустарга, маастар-кылаастарга үөрэннибит. Үйэтитиигэ үлэлээтибит. Кэлэр сылга вакцинация буолуоҕа, ыһыахтыахпыт, күһүн элбэх тэрээһиннэр буолуохтара диэн эрэнэбит. Дьон-норуот тыына хаайтарда. Атах тэпсэн олорон кэпсэтиэн, кэнсиэрдэри көрүөн, тыынын таһаарыан баҕарар. Ол эрээри, биһиги тулуйуохтаахпыт. Былыт быыһынан күн тыган эрдэҕинэ най барыа суохтаахпыт. Барыгытын кэлэн иһэр саҥа дьылынан, кытаанах доруобуйаны, дьолу соргуну баҕарабын.

edersaas.ru

+1
0
+1
0
+1
0
+1
0
+1
0
+1
0
+1
0