Ил Дархан Айсен Николаев Анал этиитигэр быйылгы ойуур баһаардарын, тахсыбыт хоромньуну туоратыыга үлэлэр тустарынан иһитиннэрдэ. “Авиалесоохрана” үлэһиттэрин элбэтии, ойуур баһаардарыгар туһаныллар тиэхиньикэ пааркатын хаҥатыы, хотугу улуустарга Арктикатааҕы авиаотделение тэриллиитин туһунан эттэ.
Сайын устата өрөспүүбүлүкэ үрдүнэн 16 улууска 46 нэһилиэнньэлээх пууҥҥа ойуур баһаардара кутталы үөскэтэ сырыттылар. Баһаары умуруорууга барыта 26 тыһыынчаттан тахса киһи кыттыбыта. Ол иһигэр атын эрэгийиэнтэн кэлбит ЫБММ, ойуур хаһаайыстыбатын үлэһиттэрэ. ЫБММ, Оборуона министиэристибэтин, Саха сирин авиахампаанньаларын көтөр ааллара уоту умуорууга үлэлэспиттэрэ.
– Ойуур баһаардарын кэмигэр дьоммут-сэргэбит туора туран хаалбакка, уоту кытары охсуһууга бары тахсан үлэлэстилэр. Атырдьах ыйыгар Горнай улууһун Бэс Күөлүгэр ойуур баһаарыгар 32 дьиэ уокка былдьаммыта. Кылгас кэм иһигэр 34 толору хааччыллыылах олорор дьиэ, 9 хотон, ол иһигэр 100 сүөһү киирэр улахан хотоно, тутулуннулар. Ону сэргэ гаас, уот ситимнэрэ, оптоволокно оҥоһулуннулар. РФ бэрэсидьиэнэ Владимир Путин этиитинэн, 2022 сылга Бэс Күөлүгэр саҥа оскуола тутуута саҕаланыаҕа. Ону таһынан нэһилиэккэ сынньалаҥ киинэ тутуллуохтаах. Бөһүөлэги чөлүгэр түһэриигэ “АЛРОСА” хампаанньа 200 мөлүйүөн солкуобайы ыыппыта. Ону сэргэ “ТаасЮрях-Нефтегазодобыча”, “Полюс Алдан” хампаанньалар, биирдиилээн тэрилтэлэр көмөлөстүлэр. 2022 сылга ойууру баһаартан харыстааһыҥҥа 1,6 мөлүйүөн солкуобай ыытыллыаҕа. Ойууру баһаартан харыстыыр систиэмэни төрдүттэн уларытыахпытын наада. Урукку курдук хас биирдии баһаарга эппиэттээх тэрилтэ бэйэтин бэйэтигэр сылдьара тохтуохтаах. Ити айылҕа харыстабылын саҥа миниистиригэр сүрүн сыал-сорук буолуоҕа, – диэн иһитиннэрдэ.
Ил Дархан бу боппуруоска сыһыаран улуустар, нэһилиэктэр ойууру харыстааһыҥҥа үлэлэһиилэрин, ойууру чөлүгэр түһэриигэ үлэлэһии барыахтааҕын эттэ. Манна анал бырагыраама оҥоһуллуон наадатын эттэ. «Саха сирэ айылҕаны харыстааһыҥҥа, ойууру чөлүгэр түһэриигэ биир кэлимник үлэлиир бырагырааманы оҥорон таһаарыаҕар эрэнэбин», – диэн бэлиэтиир кини.
Аграфена КУЗЬМИНА