Анал бырагыраама, «өйдөөх чаһы» — барыта дьон туһугар

Ааптар: 
Бөлөххө киир:

Өрөспүүбүлүкэтээҕи 3 №-дээх килиниическэй балыыһа кылаабынай бырааһын солбуйааччы Вера Никифорова бүгүн куйаар ситиминэн быһа сибээскэ тахсан дьон ыйытыытыгар хоруйдаата.

Чөлгө түһүүгэ анал бырагыраама оҥоһуллар

—Ковидынан ыалдьыбыт дьону чөлүгэр түһэриигэ, чэбдигирдэр физкультуранан дьарыктааһыҥҥа улахан болҕомто ууруллар. Быраас пациент амбулаторнай каартатын, выпискатын көрөр уонна хас биирдии ыарыһахха чөлүгэр түһэригэр анаан тус-туспа индивидуальнай бырагыраама бэлэмниир. Пациены кытары сибээстэһэр уонна киниэхэ анаан чопчу талыллыбыт бырагырааманан дьарыгы саҕалыыр. Хас биирдии пациент арҕах буолбут ыарыылааҕа, астмалааҕа, сүрэҕэ, сүһүөҕэ ыалдьара, уо.д.а. барыта учуоттаныллар.

Киһи бэйэтэ эппиэтинэстээх буолуохтаах

—Коронавирус инфекцията салгынынан бэриллэр. Киһи бэйэтин сирэйин-хараҕын, муннун-айаҕын таарыйыа суохтааҕа өйдөнөр, ол туһунан сэрэтиллэр. Ханныгын да иһин, бу хас биирдии гражданин эппиэтинэһэ. Онон бары миэрэлэри тутуһар, мааска кэтэр, илиини сууна сылдьар, бэйэ икки ардыгар тэйиччи буолууну тутуһар ордук.

Үлэлиир сири, хоһу иккилии чаас буолан баран салгылатыҥ. Илиигитин хайаан да харыстанар сириэстибэнэн соттуҥ, суунуҥ. Маасканы хайаан да кэтиҥ. Тэрилтэҕэ хайаан да дезраствор баар буолуохтаах. Кабинекка, үлэлиир сиргитигэр ким да суох эрэ буоллаҕына, маасканы устуоххутун сөп.

ПЦР, ИФА туһунан

—ПЦР, ИФА төлөбүрдээх анаалыстарын биһиги балыыһабыт оҥорор.  Ону сэргэ, үлэҕэ киирээччилэр санитарнайдарын барыахтарын сөп. Мэдиссиинэ көрүүтүн ааһалларыгар бириэмэ ананар. Ону таһынан, төлөбүрдээх өҥөҕө өссө флюорографияҕа түһэллэригэр бириэмэ ананар.

«Өйдөөх чаһы» абырыаҕа

—Телемэдиссиинэ сайдара олус наада. Билигин телемэдиссиинэ баар буолан, хоруона хамсыгын кэмигэр сирэй көрсүү аҕыйах, итинэн мэдиссиинэ үлэһитин доруобуйата эмиэ харыстанар. Телемэдиссиинэ көмөтүнэн оройуоннар балыыһаларын кытары быһа сибээһинэн тута үлэлэһэр олус табыгастаах ньыма буолара өйдөннө. Бу ньыманан туһанан эмтээһиҥҥэ, ыарыһах туругун билиигэ, көһөрүүгэ, сүбэлэр-амалар оҥоһуллаллара олус үчүгэй.

Маны сэргэ, дистанционнай гериатрия диэн бырайыак баар. Былаан быһыытынан бу хайысханан «Өйдөөх чаһы» диэн өҥө киириэҕэ. Онно, холобур, кырдьаҕас киһи «өйдөөх чаһылаах» сылдьар буолуоҕа.  Оччоҕуна быраас кинини ыраахтан хаанын баттааһына хамсыырын, о.д.а. көрө сылдьыаҕа. Бу «өйдөөх чаһы» ыраахтан барытын бырааска биллэрэ туруоҕа. Онон телемэдиссиинэ сайдара олус наадалаах уонна туһалаах.

+1
0
+1
0
+1
0
+1
0
+1
0
+1
0
+1
0