Маны аах Успуорт

Анабыл хоһооннор: Анастасия Диодороваҕа, Алена Дмитриеваҕа, Степанида Артахиноваҕа

 СӨҔҮӨМ ҮЙЭМ ТУХАРЫ

/Токиотааҕы XVI паралимпийскай оонньууларга кытта сылдьар үс чулуу сахабыт кыргыттарыгар:
АНАСТАСИЯ ДИОДОРОВАҔА, АЛЁНА ДМИТРИЕВАҔА, СТЕПАНИДА АРТАХИНОВАҔА ананар/

Сөҕөр диэнтэн сылайбаппын
Кэрэхсиибин, сөҕөбүн!
Хантан маннык күүһү ылар
Сахам күүстээх үс кыыһын!

Харбыыр, ытар, волейболлуур
Хорсун хоодуот кыргыттар!
Саха сирин киэн туттуута!
Сыдьаайаллар сулустуу!

Ыарыы киэнэ кытаанаҕа,
Ытыыр диэнэ күүстээҕэ
Дьылҕаларын оҕустаҕа,
Самнарардыы саайдаҕа.

Нарын намчы кыргыттарбыт
Харах уутун кыайаннар
Икки төгүл күүстээх санаа
Иккис тыыны биэрдэҕэ!

Улуу дьоппуон дойдутугар
Туруулаһа тиийдилэр!
Күннээх дойду мэтээлиттэн
Кэтэр чиэскэ тигистиннэр!

Сымса буолуо этэр тылым
Сөҕөн сөҕөр тыл тиийбэт!
Маннык чулуу кыргыттары
Сөҕүөм үйэм тухары!

 

 

ОСТУОРУЙА НАСТЯТА!
/Анастасия Диодороваҕа ананар/

Настя-Настя, Настенька
Дьэ биир сүрдээх дьылҕа дии!
Уоту-ууну туорааҥҥын
Улуу аакка тигистиҥ!

Аакка тиксии буолбатах —
Олох иһин охсуһуу!
Тулуур, дьулуур, мөккүһүү
Күүстээх санаа кынатыҥ.

Сүгүрүйэ сөҕөбүн
Ийэ-аҕа бу күүһүн!
Ытыы-соҥуу сууланан
Сыппатахтар иэдээнтэн.

Оҕолорун бүөбэйдээн
«Олох кэрэ» дэттэрэн,
Айыылартан көрдөһөн
Сөхтөрдүлэр бар дьону!

Үһүө буолан күннэтэ
Олох иһин охсуһуу!
Үһүө буолан сыллата
Кыайыыларга дабайыы!

Бу үс киһи кыайыыта!
Бу үс киһи ситиитэ!
Настя-Настя, Настенька
Остуоруйа НАСТЯТА!

 

МАЛАДЬЫАС
/Алёна Дмитриеваҕа ананар/

Сунтаар сирэ сураҕырда,
Кэмпэндээйи кэпсэннэ
Алёнабыт төрүт сирин
Туоһуласта дьон-сэргэ.

Ханна маннык талаан үөскүүр?
Хантан маннык күүс ылар?
Сүүрэр атах суоҕа биллэр —
Санаа күүһэ бачча дуу?

Аба-сата күүһүттэн
Мээчик үөһэ кыырайда!
Ону кытта тэҥинэн
Аата тэҥҥэ аатырда.

«Аут» саайар көҥүллэммэт
Быраабыла кытаанах,
Арай аата «Аут» барда
Ырааҕынан дуорайда!

Атахтаах да ситэн тиийбэт
Сирдэринэн кэрийдэ!
Сылдьар сирин аайытын
Саха сирин ааттатта!

Алёнабыт Маладьыас!
Саха ньоҕой тулуура!
Көтөҕүллэр мин сүргэм
Кини маннык күүһүттэн!

 ОХЧУТ КЫЫС
/Степанида Артахиноваҕа ананар/

Киһи араас талааннаах:
Ыллыыр, айар, суруйар
Степанида дьоҕура
Олус дьикти, ураты.

Кини кыра сааһыттан
Оххо ыта үөрэммит,
Кыыһын сэдэх талаанын
Таба көрбүт аҕата.

Дьарыктаабыт, такайбыт
Тахсар суолун алҕаабыт:
«Охтор-бохтор буолумаар,
Охчут бэрдэ эн буолаар!»

Кульбертинов бэргэнэ
Бэриллибит дьэ чахчы!
Охчут кыыспыт Стеша
Табар сыалын хайаан да!

Фашист саллар снайпера
Кульбертинов буолбута!
Иллээх кэмҥэ Стеша
Бигэргэттэ дьэ ону!

Полина-Победа
Уус Алдан
2021 с.

1
1