СӨ Ил Дархана Айсен Николаев коронавирус инфекцията тарҕанар куттала баарын, ыарыы дойдуга өрө турбутун, алдьархай хантан ааҥнаан кэлиэ биллибэтин, онон нэһилиэнньэ эппиэтинэстээх буоларын өссө төгүл тоһоҕолоон эттэ.
edersaas.ru
Айсен Николаев: “… Өссө биир түгэни бэлиэтиэхпин баҕарабын. Бүгүн биһиги РФ кылаабынай санитарнай бырааһа Анна Попова быһаарыытын туттубут. Ол эбэтэр, Роспотребнадзор Саха сиринээҕи управлениетыгар коронавирус инфекциятын быһаарар быраап бэрилиннэ”, – диэн бүгүн, муус устар 10 күнүгэр, сарсыардааҥҥы брифиҥҥэ иһитиннэрдэ.
Атыннык эттэххэ, бүгүҥҥүттэн ыла Саха сиринээҕи Роспотребнадзор управлениета короновирус инфекцията баарын-суоҕун бигэргэтэр анаалыстары Новосибирскай куоракка “Вектор” институкка ыытыа суоҕа. Маннык быһаарыы ылыллыбыта Саха сирин эпидемияны утары охсуһар сулууспатын үлэтэ үчүгэй хаачыстыбалааҕын бигэргэтэрин Айсен Николаев бэлиэтээтэ.
“Оттон ити кэлбит үс киһи анаалыстарын “положительнайынан” ааҕар туһунан бүгүн сарсыарда өрөспүүбүлүкэ кылаабынай санитарнай бырааһын кытары суһаллык быһаардыбыт. “Вектортан” бигэргэтиини көрдөһүөхпүт суоҕа. Тоҕо диэтэххэ, килииникэ уонна биһиэхэ баар чахчылар коронавирус инфекцията баарын бигэргэтэллэр. Инникитин даҕаны, анаалыстары Саха сиринээҕи Роспотребнадзор управлениетын сулууспалара бигэргэтэр буолуохтара. Бу өрөспүүбүлүкэ нэһилиэнньэтин доруобуйатын харыстыырга суһал дьаһаллары ыларга наадалаах”, – диэтэ Ил Дархан.
Надежда ЕГОРОВА, “Саха сирэ” хаһыат, edersaas.ru