Саха сиринээҕи клинико-диагностическай лаборатория сулууспатын үлэһиттэрин научнай-практическай кэмпириэнсийэлэрэ Арассыыйа исписэлиистэрэ кыттыылаах ыытылынна. «Лаборатория сулууспата – аныгы клиническэй балыыһа инники иһэр өрүтэ» Бүтүн Арассыыйатааҕы научнай-практическай кэмпириэнсийэҕэ лаборатория сулууспатын кыһалҕаларын уонна инники сайдыытын дьүүллэстилэр.
edersaas.ru
Президиумҥа СӨ доруобуйа харыстабылын миниистирин солбуйааччы Людмила Вербицкая, СӨ Доруобуйа харыстабылын министиэристибэтин сиэстэрэ дьыалатын салайыыга штаты таһынан кылаабынай исписэлииһэ Аграфена Яковлева, Саха Өрөспүүбүлүкэтигэр клиническэй-лабораторнай диагностикаҕа штаты таһынан кылаабынай исписэлиис Степанида Шамаева, «Диагностика лабораторията» медицинскэй сиэстэрэлэр Арассыыйатааҕы ассоциацияларын секциятын бэрэссэдээтэлэ Наталья Коковина үлэлээтилэр.
Саха Өрөспүүбүлүкэтигэр 60 диагностикалыыр лаборатория баар. Лабораторияҕа клиническэй-диагностическай (60), бактериологическай (24), цитологическай (2), иммунологическай (6) подразделениелар киирэллэр. 11 улууска бактериологическай чинчийиилэр кыайан оҥоһуллубаттар.
Лаборатория чинчийиилэрин хаачыстыбаларын уонна утумнуур ыарыыларга молекулярнай диагностиканы аныгы технологияларынан хааччыйыы уо.д.а. боппуруостар таарылыннылар.
Н.К.Коковина бэлиэтээбитинэн, микробиологическай чинчийиилэр хаачыстыбалара үлэ хас да түһүмэҕиттэн тутулуктаах. Холобур, ханнык анаалыһы анааһынтан саҕалаан, түмүктэрин таһаарыыга тиийэ. Ол эбэтэр, хаачыстыба систиэмэтигэр 12 сүрүн өрүт оруолу оонньуур. Ону сэргэ, анаалыстар хаачыстыбалара үлэһиттэр ахсааннарыттан, кинилэр билиилэриттэн, наадалаах тэриллэринэн хааччыллыыларыттан быһаччы тутулуктаах.
Чуолаан, бактериологическай лабораторияларга каадырдары бэлэмнээһиҥҥэ кыһалҕалар үөскүүллэр. Онон, каадырынан хааччыллыы ситэтэ суоҕа ыйылынна.
Кэмпириэнсийэ кыттыылаахтара Арассыыйа регионнарыттан кэлбит биир идэлээхтэрин үлэлэрин сэргээн иһиттилэр. Москва Л.А.Ворохобов аатынан клиническэй балыыһатын кылаабынай медицинскэй сиэстэрэтэ Л.А.Афонина лаборатория сулууспатыгар инновационнай үлэлэри бэйэтин балыыһатын холобурунан кэпсээтэ. Кинилэр балыыһаларыгар анаалыска сакаастар бары лаборатория тиһигэр быһаччы киллэриллэллэр эбит. Ол түмүгэр амбулатория уонна сытар балыыһа ханнык баҕарар бырааһа ыарыһах лабораторияҕа чинчийиилэрин түмүгүн онлайн-эрэсииминэн билсэр кыахтаах. Ити бырааска да, эмтиир тэрилтэлэргэ да табыгастаах.
143 исписэлиис кыттыылаах кэмпириэнсийэ түмүгэр резолюция ылылынна. Кэккэ этиилэр ортолоругар Саха сирин лабораторияларын орто сүһүөх исписэлиистэрин таһымнарын (ол иһигэр, улуус балыыһаларын) үөрэтэр куурустар көмөлөрүнэн үрдэтиини салгыы тэрийии киирдэ.
Надежда ЕГОРОВА, «Саха сирэ» хаһыат, edersaas.ru