Ил Дархан Айсен Николаев федеральнай “Россия24” ханаалга быһа биэриигэ тахсан, өрөспүүбүлүкэҕэ эпидемиологическай балаһыанньа туһунан интервью биэрдэ.
— Өрөспүүбүлүкэҕэ эпидемиологическай балаһыанньа, Арассыыйаҕа барытыгар буоларын курдук, уустук. Алтынньы 6 күнүттэн ыла 100-тэн тахсалыы киһи күн аайы ыалдьар. Бүгүн 122 киһи ыалдьыбыта билиннэ. Бу кэм устата барыта 10 729 киһи ыарыйда, кинилэртэн 6 тыһыынчаттан тахса киһи үтүөрдэ.
Билиҥҥи сорукпут – инфекция тарҕанарын тохтотуу уонна ыарыы аҕыйааһыныгар тиэрдии.
Анаалыһы туттарыы ахсаанынан дойду үрдүнэн бастыҥнар кэккэлэригэр баарбыт. Эпидемия саҕаланыаҕыттан, кулун тутар ыйтан анаалыһы ылыыны уонна лаборатория ахсаанын элбэтиигэ болҕомтобутун уурбуппут. 960 тыһыынча кэриҥэ нэһилиэнньэҕэ 533 тыһыынчаттан тахса анаалыс оҥоһулунна. Бу күннэргэ 5 тыһыынчалыы кэриҥэ анаалыһы тутан, лабораториялар өрөбүлэ суох, күнүстэри-түүннэри үлэлииллэр. Барыта 14 лаборатория баар.
Ыарыы “иккис долгуна” кэлбитигэр ыарыһах ахсаана элбээн, анаалыс түмүгэ 7-10 күн иһинэн кэлэр буола сылдьыбыта, билигин 3-5 күнүнэн кэлэр буолла. Улуустарга, суол-иис өттүнэн тиэрдии уустуктардаах буолан, 7-9 күнүнэн түмүгэ кэлэр.
Билигин ыарыы сибикитэ биллибитин кэннэ, анаалыс түмүгэ кэлэрин кэтэспэккэ эрэ, бириэмэни куоттарбакка, эмтээһини саҕалыы турар буоллубут, — диэн Айсен Сергеевич билиҥҥи балаһыанньаны билиһиннэрдэ.
Ангелина Васильева, «Саха сирэ» хаһыат, edersaas.ru
Хаартыска: СИА