“Коронавирус анаалыстарын түмүгүн уһуннук кэтэһии кыһалҕата суох буолла”, — диэн өрөспүүбүлүкэтээҕи суһал ыстаап салайааччытын солбуйааччы Ольга Балабкина брифиҥҥэ иһитиннэрдэ.
Суһал ыстаап быһаарыытынан, ыраах сытар Арктика улуустарыгар экспресс-тестэри ыытыахтара. Бу ПЦР анаалыһы лабораторията суох миэстэтигэр оҥоруохтарын сөп.
Каникул кэнниттэн оскуолаларга үөрэх саҕаланна. Харыстанар миэрэлэр булгуччу тутуһуллуохтаахтар – маасканы, бэрчээккини кэтии, салгыны ыраастааһын, социальнай дистанцияны тутуһуу, о.д.а. 65-тэн аҕа саастаах уонна олоҕурбут ыарахан ыарыылаах педагогтар тэйиччиттэн олорон үөрэтиэхтээхтэр, эбэтэр “больничнай лиис” ылыахтаахтар.
Ольга Балабкина иһитиннэрбитинэн, Ньурбаҕа кырдьаҕастар, инбэлииттэр интэринээт-дьиэлэригэр уонна Өлүөхүмэтээҕи психоневрологическай диспансерга үлэһиттэр уонна олохтоохтор ыарыйдылар. Суһал ыстаап кинилэр түргэнник үтүөрэллэригэр миэрэлэри ылар.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн